Kapinkun-kulang tulo ka bulan ang gilungtad sa milabayng unang yugto sa kalihukang protesta batok sa korapsyon ug burukrata-kapitalismo. Nagsugod kini niadtong Setyembre ug misangpot sa nasudnong koordinadong demonstrasyon niining Nobyembre 30. Matag semana taliwala niini, adunay mga walkout ug demonstrasyon sa mga estudyante sa mga unibersidad gikan sa amihanang Luzon hangtud sa mga syudad sa Visayas ug Mindanao. Sa nagkalain-laing komunidad, lungsod, pabrika, upisina, ug simbahan, nagrali ug nagmartsa ang nagkalain-laing sektor nga gihiusa sa komon nga kasilag sa korapsyon ug sa dunot nga sistema.

Nagsugod sa iskandalo sa binilyong pisong kikbak sa puno sa anomalyang proyektong flood control. Sa wala madugay, mibuto ang uban pang mas grabeng porma sa korapsyon sa gubyerno. Nabutyag ang maanomalyang “farm-to-market road” ug nagkalain-laing imprastruktura. Nabutyag usab ang gatusan ka bilyong pisong “alokabol” sa nasudnong badyet, ug ang iligal nga paggamit ni Marcos sa pondo sa PhilHealth.

Nagsugod sa panawagan nga “tanang nalambigit, kinahanglang manubag” ug pagmakmak sa mga upisyal sa DPWH ug sa ilang mga kakunsabang kontraktor, kongresista, ug senador. Wala madugay, singgit na sa mga kabatan-onan ug sa lain-laing sektor ang “Marcos, Duterte papahawaon!” human mabutyag nga si Marcos mismo mao ang Hari sa Kawatan nga anaa sa pungkay sa bungtod nga gikawat nga bahandi, ug si Sara Duterte mao ang Reyna sa Korapsyon nga nag-usik-usik sa gatusan ka milyong pondo sa katawhan. Gihisgutan karon ang pagtukod og national transition council aron iduso ang interes sa demokratikong mga sektor sa unsamang ipuli nga gubyerno.

Ang pagbaha sa protesta sukad Setyembre mahimong ikumpara sa makasaysayanong mga balud sa protesta sa nasud. Sa milabayng mga dekada, miulbo sa makadaghang higayon ang protesta sa katawhan nga nakapalagpot sa duha ka presidente (Marcos niadtong 1986 ug Estrada niadtong 2001). Dugang pa niini ang makinasudnong pag-alsa sa mga kabatan-onan sa First Quarter Storm niadtong 1970, mga welgang bayan niadtong 1989-1990, mga rali batok sa korap ug pasistang rehimeng Arroyo, ug lapad nga demonstrasyon batok sa pork barrel niadtong 2013-2014.

Salamin sa lapad ug lalum nga kasuko sa katawhan ang pag-ulbo sa kalihukang protesta. Ang paspas nga pagbusikad niini timaan sa nagbukal-bukal nga kasuko sa katawhan sa walay hunong nga pagsaka sa presyo, paglansang sa sweldo, ug kinatibuk-ang pagkahagba sa ilang panginabuhian, gikan pa sa panahon ni Duterte ug ilabina sukad milingkod si Marcos sa gahum. Labaw pang midilaab ang kasuko sa katawhan atubangan sa malukpanong kalamidad gikan sa Cebu hangtud Palawan tungod sa bagyo ug sa palpak nga proyektong flood control. Ang pagbulsa sa binilyong pisong kwarta sa katawhan nagdugang pa sa dili mahubsang kasuko sa katawhan sa kawatan nga pamilyang Marcos.

Naglunang sa lalum nga pulitikanhong krisis ang rehimeng Marcos tungod sa pagkusog sa mga protesta. Labaw kining natay-og dihang nabutyag nga si Marcos mismo ang nakadawat og dili moubos sa ₱25 bilyong kikbak o “SOP” isip bayad sa mga proyektong imprastruktura nga iyang gimando nga isal-ot sa badyet. Sa pagsulay nga panalipdan si Marcos, pipila ka taas nga upisyal niya ang gisakripisyo ug gipapahawa. Lakip niini ang hepe sa gabinete nga ginganlang nalambigit sa anomalya.

Gitukod ni Marcos ang “independyenteng komisyon” nga kuno para mag-imbestiga sa mga anomalya, apan ang tinuod, ginatabunan niini ang papel sa Malacañang sa korapsyon. Para magpakitang-gilas ug pahupayon ug ilikay gikan kaniya ang kasuko sa katawhan, giduso karon ni Marcos nga kasuhan ug dakpon ang pipila ka dagkung kontraktor ug iladong mga pulitiko.

Nagpakaaron-ingnon nga kontra-korapsyon si Marcos sumala sa tambag sa imperyalistang amo aron pahuyangon ang kalihukang protesta batok sa korapsyon. Kaabag niya ang pipila ka lider sa Akbayan nga subsub ang paningkamot nga ilihis ang kalihukang anti-korapsyon gikan sa pagpanubag kang Marcos ug pagtabon sa panawagan nga papahawaon siya. Subay usab sa tambag sa US, gimando ni Marcos ang dugang pagtaas sa sweldo sa mga sundalo ug pulis aron konsolidahon ang iyang kontrol sa AFP ug PNP ug mas hingpit nga magamit kini sa brutal nga todo-gera batok sa masang mag-uuma sa kabanikanhan ug sa pagsumpo sa hulga sa labaw pang paglapad sa mga protesta sa katawhan sa umalabot.

Human sa makanunayong paglapad sukad Setyembre, anaa karon sa yugto sa konsolidasyon ang kalihukang protesta batok sa korapsyon ug burukrata-kapitalismo, sa pagpalig-on ug pag-andam alang sa subling pagbwelo. Hagit sa mga nasudnon-demokratikong pwersa nga anaa sa unahan sa kalihukan ang pag-sumada ug pagkuha og mga leksyon gikan sa milabayng tulo ka bulan. Hagit nga palig-onon ug palapdon ang ilang mga kahugpungan, dugang palapdon ang ilang mga alyansa, ug palig-onon ang baruganan ug determinasyon sa pagbatok sa korapsyon sa rehimeng US-Marcos.

Hagit kanila nga padayong mag-andam sa mosunod nga yugto pinaagi sa pag-abot ug pag-organisa sa mas daghang mga pabrika, komunidad sa kabus, eskwelahan, ug ubang sentro sa populasyon sa tibuok nasud, ug pagpadaghan sa mga aksyong protesta sa masa sa ilang lokalidad. Hagit nga palalumon ang pagsabot sa burukrata-kapitalismo sa lain-laing porma niini ug sa gamot nga mga problema sa pag-antus sa katawhan. Kinahanglang palapdon pa ang alyansang anti-korapsyon ug pahugton ang panaghiusa batok sa paghari sa mga Marcos ug Duterte. Hagit usab ang pagbutyag sa mga pekeng progresibo ug ultra-konserbatibo aron mabira ang masa batok sa korapsyon nga ilang ginalingla ug ginalihis sa sayop nga dalan sa pagyukbo sa hari sa korapsyon.

Hagit sa Partido ug mga rebolusyonaryong pwersa nga magpalig-on taliwala sa nagpadayon nga lapad nga kalihukang anti-korapsyon sa katawhan ug pagsupak sa pasismo sa rehimeng US-Marcos. Dugang palapdon ang mga tago nga organisasyong masa aron padayon nga pukawon ug awhagon ang lapad nga masa sa katawhan nga iasdang sa demokratikong rebolusyon sa katawhan isip tinuod nga solusyon sa krisis. Atubangan sa grabeng pagdumot sa nagnana nga kadunot sa tibuok reaksyunaryong estado, haum kaayo karon ang sitwasyon sa pagrekrut alang sa Bagong Hukbong Bayan ug sa pagpaasdang sa gubat sa katawhan sa kabanikanhan.