Malampuson nga gipahigayon sa National Democratic Front of the Philippines (NDFP) ang ikalima nga internasyunal nga teoretikal nga kumperensya nga may temang Pasismo sa Ika-21 nga Siglo sa Pusod sa mga Imperyalistang Nasud. Gihimo kini gikan Nobyembre 28 hangtud 29 sa Utrecht, The Netherlands.

Gisalmutan ang kumperensya sa 125 ka indibidwal gikan sa 71 ka partido komunista ug organisasyong masa. Beynte sa maong mga partido ug grupo ang nagsumite og mga kontribusyon nga gihisgutan sa kumperensya. Gihalad sa NDFP ang kumperensya sa paghandum kay Ka Louie Jalandoni, proletaryong internasyunalista ug martir sa rebolusyong Pilipino.

Nakapukos ang duha ka adlaw nga kumperensya sa teoretikal ug historikal nga pagsabot sa pasismo gikan sa mga sinulat nila Lenin, Stalin, ug Mao. Gipalig-on niini ang kahulugan sa pasismo subay sa konsepto ni Georgi Dimitrov, usa ka komunistang Bulgarian nga nasilbing pangulo sa Communist International niadtong dekada 1930. Matud ni Dimitrov, ang makihut-ong nga kinaiya sa pasismo anaa sa porma sa “dayag nga diktadurya sa labing reaksyunaryo, labing sobinista, ug labing imperyalistang bahin sa kapitalismo sa pinansya.” Kinaiya sa monopolyo kapitalismo nga nalubog sa krisis ang pagka-anti-komunista, ultra-reaksyunaryo, ug kabangis sa pagsumpo sa hut-ong mamumuo.

Gihisgutan sa kumperensya ang subling pagkusog sa pasismo tungod sa krisis sa kapitalistang sistema sa kalibutan, ilabina human sa krisis sa pinansya niadtong 2008-2009. Giila nila ang mga porma sa pasismo ug pasisasyon sa mga imperyalistang nasud nga nakapokus sa mosunod: 1) pasisasyon sa burgis nga estado; 2) paggamit og AI (artificial intelligence) ug abanteng teknolohiya aron sumpuon ug dugang paghimuslan ang hut-ong mamumuo; 3) paggrabe sa sobinismo ug reaksyunaryong mga ideolohiya; ug, 4) pagtunhay sa mga pasistang kalihukang masa.

Ang pasisasyon sa burgis nga estado mao ang proseso diin nahukasan ang burgis liberal nga demokrasya ug nabutyag ang mas awtoritaryan ug mapanumpuong mga lakang ngadto sa dayag nga paghari sa teror.

Adunay lagsik nga panag-inambitay mahitungod sa interaksyon sa pasismo sa mga imperyalistang nasud ug sa mga neokolonya, diin batakang kinaiya sa estado mao ang pasismo. Sa mga semikolonya unang gisulayan ug gipatuman sa imperyalismo ang mga eksperimento sa paggamit og terorismo sa estado. Gigamit niini ang mga programa kontra-insurhensiya, ayudang militar, manipulasyon, ug bangis nga pagsumpo sa katawhan.

Adunay espesyal nga diskusyon sa talagsaong kasinatian sa Ireland, nga nag-ila sa kaugalingon isip kapitalistang semikolonya, ug Palestine, usa ka okupadong nasud. Sa mga malingkawasnong kalihukan niining mga nasura, gihiusa ang anti-pasista ug anti-imperyalistang pakigbisog.

Gipunting sa kumperensya isip hinanaling tahas sa proletaryado ang pagtukod og “organisasyon pang-away” aron suklan ang gitukod nga “organisasyong pang-away” sa mga pasistang kalihukan. Naghatag ang mga kauban gikan sa imperyalistang nasud og mga konkretong pananglitan sa anti-pasistang pakigbisog.

Gipaambit nila ang mga leksyon gikan sa ilang gimbuhatong masa, adbokasiya, pagdepensa sa kaugalingon, ug pag-organisa sulod sa mga unyon, partido, organisasyon, ug kalihukan. Gihatagan nilag duut ang importansya sa pagtukod sa lapad nga anti-pasistang nagkahiusang prente sa mga mamumuo ug uban pang demokratikong sektor. Matud pa nila, ang pagtukod niini nga alyansa nagpasabot sa pagsalikway sa sektaryanismo ug konserbatismo, samtang nagmabinantayon batok sa mga sosyal demokrata ug uban pang oportunistang elemento. Nasayod sila nga integral ang pagpangulo sa proletaryado sa nagkahiusang prente sa pagsumpay sa mga pakigbisog sa masa sa pagwagtang sa gamut sa pasisasyon. Yawe kini sa pagbungkag sa monopolyo kapitalismo ug diktadurya sa burgesya.

Kumbinsido ang mga mitambong gikan sa mga imperyalistang nasud nga kinahanglang tukuron ang lig-on nga partido sa mga mamumuo. Kinahanglang ipatuman ang mga sekretong operasyon, kakumbina ang dayag gimbuhaton, aron makasugakod sa pasistang atake ug makab-ot ang mga kadaugan alang sa hut-ong mamumuo. Kinahanglan usab nga labaw pang palapdon ang panaghiusa sa mga pakigbisog sa pusod sa mga imperyalistang nasud ug sa mga semikolonya.

Nahuman ang kumperensya sa mubo nga kulturanhong programa nga may temang “Gikan sa Palestine hangtud Pilipinas, bungkagon ang makinang iggugubat sa US,” dungan sa paghandum sa International Day of Solidarity with the People of Palestine.