Subling nagmartsa sa kalsada niadtong Nobyembre 30 ang liboan ka Pilipino sa lain-laing bahin sa nasud aron magprotesta batok sa nangabutyag nga malukpanong korapsyon sa gubyerno. Atol kini sa ika-162 nga adlawng natawhan sa amahan sa rebolusyong Pilipino nga si Andres Bonifacio.

Niadtong adlawa, milanog ang mga panawagan sa katawhan sa pagpanubag sa tanang nalambigit sa kahiwian, pagbungkag sa mga dinastiya sa pulitika, ug pagpahawa sa poder sa presidente nga si Ferdinand Marcos Jr, bise presidente nga si Sara Duterte, ug uban pang kurap nga mga upisyal.

Sa pagpasiugda sa Kilusang Bayan Kontra Kurakot (KBKK), kapin sa 20,000 ang nagtapok sa Luneta Park sa Maynila alang sa protestang Baha sa Luneta 2.0. Gisulayan sa rehimeng Marcos nga pugngan ang protesta sa pagbawal kanila nga magtapok ug maghimo og programa. Wala mapugngi sa maong pagpanabotahe ang singgit sa katawhan alang sa akawntabilidad ug hustisya.

Mitambong sa protesta ang nagkalain-laing grupo, pwersa, ug sektor lakip ang mga mamumuo, mag-uuma, kabus-sa-kasyudaran, estudyante, kababayen-an, ug mga tawong simbahan. Sama sa una nang gideklara sa KBKK, abli niining gidawat ang nagkalain-laing panawagan sa mga grupo lakip ang pagpapahawa kang Marcos ug Duterte ug pagtukod og transition council.

Liboan usab ang nagtapok sa protestang Trillion Peso March 2.0 nga gihimo sa EDSA sa Quezon City. Gipangulohan kini sa Simbahang Katolika ug uban pang grupo ug partido nga sakop sa Trillion Peso March Movement (TPMM).

Sa wala pa ang mga protesta, naningkamot apan napakyas ang KBKK nga makighiusa sa TPMM para sa hiniusang protesta sa Metro Manila. Wala mouyon ang mga grupo sa TPMM, ilabina ang Akbayan, nga dayag nga dad-on sa mga grupong sakop sa KBKK ang mga panawagang direktang nagtumong kang Marcos sa sistematikong korapsyon.

Gawas sa Metro Manila, nagprotesta ang mga grupong kaalyado sa KBKK sa Baguio City, La Union, Ilocos Sur, Ilocos Norte, Isabela, Tarlac, Calamba City, Cavite, Oriental Mindoro, Legazpi City, Naga City, Antique, Capiz, Aklan, Iloilo City, Bacolod City, Cebu City, Tacloban City, Davao City, Cagayan de Oro City, ug sa General Santos City. Natala usab ang mga misa, panagtigum, ug martsa sa mga pari ug lider sa simbahan kauban ang katawhan sa dili moubos sa 86 ka diyosesis sa tibuok nasud.

Sa gawas sa Pilipinas, halos 2,000 ka migranteng Pilipino ug mga kaalyado sa 30 ka syudad sa 23 ka nasud ang miapil sa kalibutanong protesta batok sa korapsyon. Gipangulohan kini sa bag-ong gitukod nga KBKK-Global.

Step down batok step up

Labaw pang mihait ang kalainan sa panawagan sa mga grupo kabahin sa pagpanubag mismo kang Marcos. Mibalibad ang Akbayan, usa sa nanguna sa TPMM, sa pag-ila sa grabeng korapsyon ni Marcos ug nanawagan na hinuon nga “mag-step up” siya sa pakigbatok sa korapsyon. Sukwahi kaayo kini sa posisyon sa KBKK nga dako ang tulubagon ni Marcos sa sistematikong kahiwian sa gubyerno.

Nanawagan usab ang Akbayan kang Marcos nga himuong prayoridad ang “anti-dynasty bill,” bisan og ang pamilya niini mao ang labing bangkaroteng dinastiya sa pulitika.

“Step down” (kanaog na) ang panawagan sa Bagong Alyansang Makabayan (Bayan, sakop sa KBKK) kang Marcos. Kini aron mahatagan og dalan ang libre ug hingpit nga imbestigasyon batok sa korapsyon ug atubangon ang iyang mga krimen batok sa katawhang Pilipino.

Human ang protesta sa KBKK sa Luneta Park, gipangulohan sa Bayan ang martsa padulong sa Mendiola aron singilon si Marcos. Gipanawagan sa grupo ang pagpahawa kang Marcos ug Duterte. Gipanawagan nila nga ilisan sila sa usa ka national transition council. Sama sa miagi, giharang sila sa liboan ka pulis ug napugos magprograma atubangan sa University of the East sa Recto Avenue. Nakigmartsa sa Bayan ang mga pwersa sa Partido Lakas ng Masa, Bukluran ng Manggagawang Pilipino, ug Sanlakas.

Sa katapusan sa programa sa Recto Avenue, giguba sa mga raliyista ang effigy ni Marcos nga nagsul-ob og korona ug sash nga bandila sa US.