Ginkundenar sang mga progresibo nga grupo kag tagpangapin sang tawhanon nga kinamatarung sa Pilipinas kag lain-lain nga pungsod ang wala sang basehan nga pagdetiner sang 2nd ID kay Chantal Anicoche, isa ka aktibista nga Filipino-American, sa Camp Capinpin, Tanay, Rizal. Nagapanawagan sila para sa iya gilayon nga paghilway kag hustisya para sa mga biktima sang pagpangbomba sa Mindoro.

Ginpaguwa sang militar nga “nakita” si Anicoche sa isa ka buho malapit sa natabuan sang engkwentro sa tunga sang isa ka yunit sang Bagong Hukbong Bayan kag militar sa Abra de Ilog, Mindoro sadtong Enero 1. Pito ka adlaw ang nagligad antes siya ginpatuhaw. Nadetenir siya sa pihak nga wala sang ginpasaka nga kaso batuk sa iya. Wala siya ginapaatubang sa iya mga abogado kag mga grupo sa tawhanon nga kinamatarung.

Nagprotesta ang mga tsapter sang Bayan kag Migrante sa mga embahada kag konsulado sang Pilipinas sa US, Canada, London kag Australia sadtong Enero 10 tubtob 19. Nagpaguwa man sang online protest, petisyon, kag talakayan tuhoy sa sitwasyon sa Mindoro sa US kag Canada. Nagsuporta man sa panawagan ang mga tsapter sang Migrante sa Hong Kong, New Zealand, Europe, kag Thailand kag mga internasyunal nga grupo para sa tawhanon nga kinamatarung.

Sa Pilipinas, nagprotesta ang mga progresibo nga grupo sa Department of Defense sadtong Enero 8 kag 12, kag sa Boy Scout Circle sadtong Enero 9 kag 16. Duha ka beses nga nagprotesta ang mga grupo sa Camp Capinpin para duawon si Anicoche sadtong Enero 10 apang wala sila ginpasugtan. Imbes, ginpalibutan kag gin-haras sila sang mga aset paniktik sang militar.