Hugot nga ginakundenar sang progresibo nga mga organisasyon sa Pilipinas kag Japan ang Acquisition and Cross-Servicing Agreement (ACSA) nga ginpirmahan sa tunga sang Pilipinas kag Japan sadtong Enero 15. Suno sa Bagong Alyansang Makabayan (Bayan), kabahin ini sang “pagdalum sang imperyalistang adyenda sa Pilipinas.”

Kasugpon ang ACSA sa Reciprocal Access Agreement (RAA) nga nagapahanugot sa pagtiner sang mga tropang Japanese sa pungsod.

“Indi ini (ACSA) pagbuligay sang mga pungsod nga may patas nga tindog kundi paghigot sa Pilipinas sa duso sang Tokyo nga liwat magmilitarisa kag sa estratehiyang Indo-Pacific sang Washington nga nagatuyo nga palibutan ang China,” suno sa Bayan.

Ginkundenar sang Asia-Wide Campaign against US-Japanese Domination and Aggression of Asia (AWC) ang nagasingki nga militarismo sang Japan.

“Ang dapat himuon sang gobyerno sang Japan mangayo sang matuod nga patawad kag maghatag sang kumpensasyon sa mga biktima sang okupasyon Japanese sa Pilipinas, indi ang pagpasingki sang militarismo,” suno sa AWC.

Sa idalum sang ACSA, pahanugutan ang Japan nga magtambak sang pagkaon, panggatong, bala kag iban pa nga lohistika para sa kaugalingon sini nga mga pwersa nga yara sa Pilipinas agud magpakigbahin sa mga war games kag iban pa nga aksyon militar sa tabon sang disaster response kag humanitarian assistance. Dugang sa ACSA, plano man sang Japan nga makaangkon sang GSOMIA (General Security of Military Information Agreement) sa tunga sini kag sang Pilipinas.

Kadungan sa pagpirma sang ACSA, naghatag ang Japan sang limos nga ₱341 milyon nga Official Security Assistance ukon ayuda militar sa AFP. Natalana ang pondo para sa konstruksyon sang pasilungan sang mga salakyan pangdagat. Magluwas pa diri, naghatag ang Japan sang ₱617 milyon nga ayuda para kuno sa pagtukod sang imprastrukturang pang-telekomyunikasyon sa Basilan, Sulu, kag Tawi-Tawi.