Gikundena sa mga progresibong grupo ug tigpanalipud sa tawhanong katungod sa Pilipinas ug lain-laing nasud ang walay basihan nga pagdetine sa 2nd ID kang Chantal Anicoche, usa ka aktibistang Filipino-American, sa Camp Capinpin, Tanay, Rizal. Nanawagan sila alang sa hinanaling paglingkawas kaniya ug hustisya alang sa mga biktima sa pagpamomba sa Mindoro.

Gipagawas sa militar nga “nakaplagan” si Anicoche sa usa ka buho duul sa nahitaboan sa engkwentro tali sa usa ka yunit sa Bagong Hukbong Bayan ug militar sa Abra de Ilog, Mindoro niadtong Enero 1. Pito ka adlaw ang milabay ayha siya gipakita. Nakadetine siya bisan og walay gipasakang kaso batok kaniya. Wala siya gipaatubang sa iyang abugado ug mga grupo sa tawhanong katungod.

Nagprotesta ang mga balangay sa Bayan ug Migrante sa mga embahada ug konsulado sa Pilipinas sa US, Canada, London ug Australia niadtong Enero 10 hangtud 19. Naghimo usab og online protest, petisyon, ug diskusyon mahitungod sa sitwasyon sa Mindoro sa US ug Canada. Sumuporta usab sa panawagan ang mga balangay sa Migrante sa Hong Kong, New Zealand, Europe, ug Thailand ug mga internasyunal nga grupo alang sa tawhanong katungod.

Sa Pilipinas, nagprotesta ang mga progresibong grupo sa Department of Defense niadtong Enero 8 ug 12, ug sa Boy Scout Circle niadtong Enero 9 ug 16. Duha ka beses nga nagprotesta ang mga grupo sa Camp Capinpin aron duawon si Anicoche niadtong Enero 10 apan wala sila gitugutan. Hinunua, giliyukan ug giharas sila sa mga aset paniktik sa militar.