Militante nga nanindugan ang mga mangunguma kag mamumugon sa uma sang Hacienda Michaela sa Barangay Talotog, Murcia, Negros Occidental batuk sa pagpang-agaw sang 22-ektarya nga duta sang Ta-ala Farms, Inc. Sugod sang Enero 12, nagkampo ang mga armado nga tinawo kag ahente sang kumpaniya para palayason ang mga residente sa ila duta nga ginatalauma.

Sa adlaw nga ini, nagsulong sa asyenda ang mga tinawo sang kumpaniya sakay sang tatlo ka magagmay nga trak kag tatlo ka backhoe. Ang isa sa mga trak may sakay nga mga armado nga gwardya. Nagpatindog sila sang mga tent kag ginkutkot ang duta nga ulumhan gamit ang mga backhoe. Ginhadlok, ginpahog kag gintayaan nila sang pusil ang mga mangunguma. Gintilawan pa nga iposas ang tatlo ka kababaehan nga mangunguma nga ginkakibot sang isa. Sadtong Enero 14, nagsugod nga magpatindog sang pader ang kumpaniya sa palibot sang gina-agaw sini nga duta.

Ang duta ginaangkon ni Bonnie Ta-ala, tag-iya sang kumpaniya pagkatapos “baklon” ini sang kumpaniya halin sa agalon mayduta nga si Arthur Bayona. Sadtong Oktobre 2025, gintilawan nga agawon ni Ta-ala ang duta apang wala siya nagmadinalag-on.

Suno sa Hacienda Michaela Farmers and Farmworkers Association, iligal ang pagbaligya sang duta tungod ginsakop ini sang pagpanagtag sang gobyerno sa idalum sang Comprehensive Agrarian Reform Program. Sadtong 2009 pa nagpaguwa sang Notice of Coverage para sa duta ang opisina sang Department of Agrarian Reform (DAR) sa Negros Occidental.

Nagpiket sadtong Enero 20 ang Kilusang Magbubukid ng Pilipinas-Negros kag National Federation of Sugar Workers sa atubang sang DAR Negros Island Region sa Bacolod City agud batikuson ang kahinay sang DAR sa pagpanagtag sang duta. Suno sa grupo, liwat naman nga ginbuyagyag sang insidente ang pagkadunot sang reporma sa duta sang estado kag padayon nga kalakasan sang pyudal nga paghari sang mga agalon mayduta sa pungsod.

Wala-tuo nga suporta ang nabaton sang mga mangunguma sang Hacienda Michaela halin sa mga grupo sang pamatan-on, artista kag iba pa.