Sunod-sunod nga protesta kag pagtipon ang ginlunsar sang lain-lain nga sektor sa pagbukas sang 2026 agud isulong ang ila mga kinamatarung sa ekonomiya kag pulitika. Sa una nga mga semana sang Enero, nalunsar ang mga hublag para sa kinamatarung sa duta kag pangisdaan, barikada kontra mina kag demolisyon, kag iban pa para sa pagtib-ong sang palangabuhian.

Mangunguma kag tumandok nga pumuluyo. Nagapadayon ang barikada kontra mina sang mga residente sang Barangay Bitnong, Dupax del Norte, Nueva Vizcaya sa pihak sang liwat nga pagtilaw sang Woggle Corporation kag mga pulis nga bungkagon ini sadtong Enero 13. Yara sa 317 ka pulis ang nagsulong agud bungkagon ang hanay sang taga-baryo. Napaslawan ang ining pagtilaw nga makasulod sang upangan sang masobra 50 ka residente ang alagyan. Tayuyon ang suporta sa barikada sang mga tagpangapin sang kapalibutan, tawong simbahan kag mga progresibong kongresista.

Mangingisda. Nagmartsa padulong sa Department of Environment and Natural Resources sa Quezon City ang Pambansang Lakas ng Kilusang Mamamalakaya ng Pilipinas sadtong Enero 19 agud pamatukan ang ginahimo nga dredging kag reklamasyon sa lain-lain nga bahin sang pungsod. Nagprotesta man sa baybayon sang Navotas City ang Pamalakaya-Navotas sadtong Enero 15 batuk sa 650 ektarya nga Navotas Coastal Bay Reclamation Project sang San Miguel Corporation kag lokal nga gobyerno sang Navotas.

Mamumugon. Nagprotesta ang mga mamumugon sang San Fernando Coca-Cola Rank and File Union sa planta sang Coca-Cola sa Barangay Baliti, San Fernando, Pampanga sadtong Enero 16. Ginbatikos sang unyon ang Coca-Cola Europacific Aboitiz Philippines sa mga paglapas sini sa mga probisyon sa ila collective bargaining agreement.

Mga drayber kag tsuper. Nagprotesta sadtong Enero 19 ang mga myembro sang Piston sa atubang sang Department of Transportation sa Quezon City para liwat igiit ang gilayon nga pagbasura sang peke nga Public Utility Vehicle Modernization Program kag pagbalik sang 5-tuig nga indibidwal nga prangkisa. Kadungan sang hublag ang mass filing para sa renewal sang mga indibidwal nga prangkisa sang mga drayber kag opereytor nga wala nagpaidalum sa konsolidasyon. Sa pagtantya sang grupo, mas o menos 500,000 ka tsuper kag opereytor ang nawad-an na sang palangabuhian tungod sa palpak nga programang “modernisasyon.”

Manugtinda kag imol. Sadtong Enero 12, nagmartsa padulong sa Pasay City Hall ang mga 200 ka myembro sang Wowee Market Vendors Association agud ipanawagan ang liwat pagbukas sang ila merkado. Imbes nga atubangon ni Meyor Emi Calixto-Rubiano, nagpanago siya sa opisina, samtang nagpatokar sang mabaskog nga musika ang iya mga tinawo agud lunuron ang panawagan sang mga manugtinda. Ginpahog pa sila sang mga pulis nga bombahon sang tubig.

Sa adlaw man nga ini, nagkadto sa Department of Social Work and Development sa Quezon City ang mga residente sang imol sa komunidad nga nahalitan sang nagligad nga mga bagyo agud sukton ang departamento sa kumpensasyon nga dapat ipanghatag sa ila. Sa pagpanguna sang Kadamay, luyag nila nga makig-dayalogo sa tiglikom sang ahensya apang wala sila gin-atubang sini.

Sa Rizal, nagprotesta ang mga asosasyon sa idalum sang Taytay Urban Poor Alliance kag Kadamay-Rizal sa Baltao Gate, Ortigas Avenue, Taytay sadtong Enero 11. Nagpanawagan sila sang gilayon nga pagpauntat sang iligal nga pagkudal sang Baltao Corporation sa mga residente sang Sityo Igiban, Barangay San Isidro sa Taytay. Mas o menos 60 ka pamilya ang gina-haras sang kumpanya.

Mga manunudlo. Nagpiket ang Alliance of Concerned Teachers (ACT) sa Department of Budget and Management sa Manila sadtong Enero 16 agud ipanawagan ang pagpaguwa sang naatrasar nga mga benepisyo, isulong ang signipikante nga dugang sa sweldo kag dugang sa badyet para sa regularisasyon kag benepisyo sang mga manunudlo kag mamumugon sa sektor sang edukasyon.

Sadtong Enero 9, nagpanawagan man ang grupo sa pagbasura sa ginatawag nga “classroom observation,” Result-based Management System (RPMS) kag iban pa nga talaksan kag rekisito nga ginatalana agud takson ang kalidad sang pagtungod sang mga manunudlo nga nagapaantus sa ila. Gingiit nila ini sunod sang pagkapatay sang manunudlo sa Muntinlupa City nga si Agnes Buenaflor sadtong Enero 7. Nabunggo ang ulo ni Buenaflor sang nalipong samtang nagapatigayon sang “classroom observation.” Nadala pa siya sa ospital apang napatay man sang ulihi.

Sa Centro Escolar University, tayuyon ang protesta sang CEU Faculty and Allied Workers Union agud igiit ang matarong nga sweldo kag benepisyo sa ila CBA. Nadismaya ang unyon sang ginpaguwa sang Department of Labor and Employment ang assumption of jurisdiction sa natalana nga adlaw sang ila plano nga pagwelga sadtong Enero 13. Mawelga kuntani ang unyon tungod sa deadlock sa negosasyon sa CBA halin pa Septyembre 2025.

Mamumugon sa ikaayong-lawas. Nagprotesta sa Quezon City ang mga mamumugon sa ikaayong-lawas halin sa apat ka ospital sang gobyerno sadtong Enero 14. Ginbatikos nila ang rehimen Marcos sa indi paghatag sa ila sang tuigan nga alawans kag iban pa nga mga benepisyo. Liwat man sila nagpanawagan nga ipasaka ang sandigan nga sweldo sang mga mamumugon sa ikaayong-lawas kag tapuson ang kontraktwalisasyon.

Migranteng mamumugon Pilipino. Nagpakigbahin ang masobra 1,000 ka Pilipino nga nars sa welga sang mga nars sa idalum sang New York State Nurses Association sadtong Enero 12 sa New York City. Kabahin sila sang 15,000 ka nars halin sa napulo ka pribado nga ospital sa idalum sang Presbyterian, Mount Sinai, kag Montefiore. Nagpanawgan sila para sa dugang nga sweldo, benepisyo kag proteksyon halin sa kalakasan sa lugar sang trabaho.

Mga pamatan-on. Ginsug-alaw sang mga pamatan-on kag estudyante ang pagsugod sang klase subong 2026 sa paglunsar sang mga protesta sa kampus sining Enero. Unod sa mga hublag nga ini ang isyu sa edukasyon, akademikong kahilwayan, lapnagon nga korapsyon kag pasismo sang rehimen US-Marcos. Ginpatigayon ang mga hublag sa mga kampus sang University of the Philippines, Saint Louis University, Far Eastern University, De La Salle University-Manila, Ateneo de Manila University, University of Santo Tomas, Technological University of the Philippines-Manila kag iba pa nga unibersidad.