Kinundenar dagiti progresibo a grupo ken salaknib ti karbengan-tao iti Pilipinas iti nadumaduma a pagilyan ti awan basaran a panangibalud ti 2nd ID ken Chantal Anicoche, maysa nga aktibista a Filipino-American, idiay Camp Capinpin, Tanay, Rizal. Immawag da para iti madagdagus a pannakawayawaya na ken hustisya para kadagiti biktima ti panagbomba idiay Mindoro.

Pinarwar ti militar a ni Anicoche ket “nasarakan” iti maysa nga abut nga asideg iti nakapasamakan ti engkwentro ti maysa a yunit ti New People’s Army ken militar idiay Abra de Ilog, Mindoro idi Enero 1. Pito nga aldaw ti napalabas sakbay a naiparang isuna. Naibalud isuna iti laksid nga awan ti naipila a kaso laban kenkwana. Saan da a paspasangwen isuna iti abugado na ken kadagiti grupo iti karbengan-tao.

Nagprotesta dagiti balangay ti Bayan ken Migrante kadagiti embahada ken konsulado ti Pilipinas idiay US, Canada, London ken Australia idi Enero 10 agingga 19. Naiyaramid met idiay US ken Canada ti online protest, petisyon ken panagtatalantan seknan iti sitwasyon idiay Mindoro. Simmuporta met iti panawagan dagiti balangay ti Migrante idiay Hong Kong, New Zealand, Europe ken Thailand ken dagiti internasyunal a grupo para iti karbengan-tao.

Iti Pilipinas, nagprotesta dagiti progresibo a grupo iti Department of Defense idi Enero 8 ken 12, ken iti Boy Scout Circle idi Enero 9 ken 16. Dua a daras a nagprotesta dagiti grupo iti Camp Capinpin tapno bisitaen ni Anicoche idi Enero 10 ngem saan da a napalubosan, nu di ket pinalikmutan ken hinaras isuda dagiti aset paniktik ti militar.