Ginkundenar sang mga grupo sang mamumugon kag tigpangapin sang kapalibutan ang pagpabaya kag indi luwas nga lugar sa trabaho sa Binaliw Landfill sa Cebu City sadtong Enero 8. Natiphag ang bukid sang basura nga ginabana-bana may kataason nga 20 ka tapak kag nagtabon sa mga bilding sa tiilan sini.Ang tambakan ginapadalagan sang Prime Integrated Waste Solutions Inc (PIWSI), ginapanag-iyahan sang burgesya kumprador nga si Enrique Razon Jr.

May 110 mamumugon sa mga bilding sa tiilan sang bukid sang basura sang natiphag ini. Ang 36 sa ila napatay kag 18 ang pilason.

Dako ang salabton sang PIWSI kag ni Razon sa natabo sa hungod nila nga pagbalewala sa mga talaksan sa kaluwasan kag ikaayong-lawas sa trabaho para makakinot kag mag-ganansya sang dako. Madugay na nga ginareklamo sang mga residente sang Barangay Binaliw ang tambakan, nga suno sa ila tuman ka baho kag nagaguba sang bukid kag mga suba sa palibot sini.