Ginkundenar han mga progresibo nga grupo ngan tagdepensa han tawhanon nga katungod ha Pilipinas ngan magkalain-lain nga nasud an waray basaranan nga pagdetiner han 2nd ID kan Chantal Anicoche, usa nga aktibista nga Filipino-American, ha Camp Capinpin, Tanay, Rizal. Nanawagan hira para ha iya dagmit nga pagpagawas ngan hustisya para ha mga biktima han panmomba ha Mindoro.

Ginpagawas han militar nga “natad-an” hi Anicoche ha usa nga luho hirani ha lugar han engkwentro giutan han usa nga yunit han Bagong Hukbong Bayan ngan militar ha Abra de Ilog, Mindoro hadton Enero 1. Pito kaadlaw an nakataliwan antes hiya ginlutaw. Nakadetiner hiya ha luyo nga waray ginsalawad nga kaso kontra ha iya. Diri hiya ginpapaatubang ha iya abugado ngan mga grupo ha tawhanon nga katungod.

Nagprotesta an mga tsapter han Bayan ngan Migrante ha mga embahada ngan konsulado han Pilipinas ha US, Canada, London ngan Australia hadton Enero 10 tubtub 19. Naghimo liwat hin online protest, petisyon, ngan talakayan hiunong ha sitwasyon ha Mindoro ha US ngan Canada. Sinuporta liwat ha panawagan an mga tsapter han Migrante ha Hong Kong, New Zealand, Europe, ngan Thailand ngan mga internasyunal nga grupo tikang ha tawhanon nga katungod.

Ha Pilipinas, nagprotesta an mga progresibo nga grupo ha Department of National Defense hadton Enero 8 ngan 12, ngan ha Boy Scout Circle hadton Enero 9 ngan 16. Duha kabeses nga nagprotesta an mga grupo ha Camp Capinpin agud bisitahon hi Anicoche hadton Enero 10 kundi waray hira tugutan. Lugod, ginpalibutan ngan ginharas hira han mga aset paniktik han militar.