Tayuyon kag wala sang kakapoy ang mga protesta sa sulod kag guwa sang Venezuela agud igiit nga ibalik ang ila presidente nga si Nicolas Maduro kag iya asawa nga si Cilia Flores sa Venezuela. Si Maduro kag Flores gin-abdak sang mga tropang Amerikano sa Caracas sadtong Enero 3 kag gindala sa US.

Sa sulod sang Venezuela, nagsugod ang adlaw-adlaw nga demonstrasyon sa mismo adlaw sang pag-abdak kay Maduro kag nagapadayon tubtob sa subong. Wala natay-og kag nagapabilin nga bug-os ang estado nga Bolivarian nga ginpundar nanday Maduro, Hugo Chavez kag mga anti-imperyalistang pwersang Venezuelan. Sa idalum sang pagpamuno ni Delcy Rodriguez, gintalana nga temporaryo nga presidente, napatawag ang pungsodnon nga pamunuan kag padayon nga nagagana ang tanan nga sanga sang gobyerno. Naghugpong bisan ang mga oposisyon nga Partido, magluwas sa bat-ulan nga tuta sang Amerika nga partido ni Maria Machado.

Sa Cuba, tunga sa milyon ang nagmartsa sadtong Enero 19 para sa lubong sang 32 ka soldado nga Cubano nga napatay samtang ginadepensahan si Maduro kag Flores sadtong abdakon sila. Lakip ang mga soldado nga Cubano sa masobra 100 ka tawo nga ginpatay sang US sa agresyon sini.

Sa Italy,puluan ka libo ang nagmartsa sa 30 ka syudad sadtong Enero 10 para makig-isa sa Venezuela kag igiit ang gilayon nga paghilway kay Maduro.

Sa India, nagpaguwa sang resolusyon sang pagpakig-isa sa Venezuela sadtong Enero 12 ang 10 ka mayor nga oposisyunista nga partido pulitikal, lakip ang nanari-sari nga mga partido komunista. Ginkundenar man nila ang mga paandam sang rehimen Trump sa Cuba, Mexico, Iran, Colombia kag Greenland. Nagpatigayon ang mga grupo sang serye sang mga hublag sa lain-lain nga bahin sang India nga gintambungan sang linibo ka mamumugon, intelektwal kag mangunguma.