Wala puas ang mga pagpang-abuso militar batuk sa pumuluyong Pilipino pagsulod sang 2026. Halin sang ikaduha nga semana sang Enero, nalista ang mga kaso sang pagpaniro, pagtilaw nga pag-abdak, pagpasaka sang mga kasong kriminal, pagpang-ipit kag iban pa nga paglapas sa tawhanon nga kinamatarung.

Sa Samar, ginpalukpan sang M203 kag ginpaarakan sang luthang sang mga soldado sang 46th IB ang duha ka mag-utod nga bata sa Sityo San Pedro, Barangay 3, San Jose de Buan sadtong Enero 3 sang hapon. Naghakot ang duha sang inugbaligya nga uling sang makasugata sang tatlo ka soldado kag gulpi na lang sila nga ginpalukpan.

Naigo sa dughan, kamot kag tiil ang manghod nga utod kag nabilin sa lugar sang pagpaniro. Wala nahibaluan sang pamilya kon ano na ang natabo sa bata nga tubtob sa subong indi makita. Samtang, ang magulang nga utod luwas nga nakadalagan.

Sa Negros Occidental, gintilawan sang mga pwersa sang 15th IB nga abdakon ang isa ka mamumugon pangkauswagan sang Paghidaet sa Kauswagan Development Group Inc. (PDG) kag kabulig sang mga mangunguma sa pagpakigbato sa Hacienda Asia Plantation Inc (HAPI). Suno sa report, nagabyahe sakay sa motorsiklo si Joselito Macapobre sa Barangay Caningay, Candoni sang gulpi siya ginbanggaan sang isa ka itom nga salakyan sadtong Enero 17. Nakapalagyo si Macapobre kag nakadalagan malapit sa kabalayan kag nagpangayo sang bulig sa mga residente. Antes ang insidente, pila ka beses nga ginkadtuan sang mga soldado sang 15th IB ang biktima sa iya balay kag gina-akusaran nga rekruter sang Bagong Hukbong Bayan.

Samtang, nareport man ang pagpanghadlok sang mga soldado kay Analyn Mirano, isa pa ka myembro sang PDG Inc sadtong Enero 16 kag 17.

Nareport man ang mga kaso sang pagpanggamo kag intimidasyon sa mga barangay sa Kabankalan City, Himamaylan City, La Castellana, kag Moises Padilla halin ikaduha nga semana sang Enero. Ginpatawag ang mga residente agud piliton sila nga “magsungka.”

Sa Negros Oriental, pila ka adlaw nga nagkampo sa Kambairan Elementary School sa Barangay Trinidad, Guihulngan City ang 50 ka soldado sang 62nd IB halin Enero 6. Ginagamo man sang mga soldado ang pila ka barangay sa Canlaon City.

Sa Metro Manila, ginpasakaan sang reklamo nga sedisyon kag iban pa nga kaso ang pinuno sang Bagong Alyansang Makabayan nga si Renato Reyes Jr, mamalitha pang-kampus nga si Jacob Baluyot, kag 32 ka iban pa sa pagtilaw nga pahipuson kag pakalmahon ang mga protesta kontra korapsyon.