Sa giya sang kahublagan panadlong, tayuyon ang pagpanikasog sang Komiteng Rehiyon sang Partido Komunista sang Pilipinas sa Isla sang Negros agud padalumon kag palaparon ang pag-ugat sini sa masang Negrosanon. Sadtong 2025, gin-report sang komite ang relatibo pagpangibabaw sa natumod nga mga kahuyangan. Tungod sini, madinalag-on nga napamunuan sang Partido ang mga paghimakas sang masang anakbalhas kag mga demokratikong sektor sa mga syudad, banwa, kag kaumhan, kag ang pagpabaskog sang mga yunit sang Bagong Hukbong Bayan (BHB) sa lima ka larangan gerilya sa isla.

Pagpanday sa ideolohiya

Desaysibo nga nagpatuman ang komite sang mga simple nga pamaagi sang pagtudlo samtang nagapabilin nga maunod ang mga pagtuon para konsolidahon ang mga katapo sang Partido. Nakalunsar ini sang mga pagtuon sa Sandigan kag Intermedya nga Kurso sang Partido. Tayuyon man ang kampanya para tun-an ang Kursong Oryentasyon kag Konstitusyon sang Partido.

Kolektibo man nga ginatun-an sang mga Partidista ang mga memorandum kag advisory sang mataas nga mga organo kag sang rehiyon. Naghatag ini sang iwag sa paghulag kag pagpatuman sang mga plano, base sa kongkreto nga kahimtangan sang inaway banwa sa isla kag sa bug-os nga pungsod.

Ginabasa kag ululupod nga ginatalakay ang pungsodnon, pangrehiyon kag lebel larangan nga mga rebolusyonaryong pahayagan, dyornal kag folio kaangay sang Ang Bayan, Rebolusyon, Ang Paghimakas, Ispading, Ang Budyong kag Ngurob. Nakabulig ini sa pagpalapad sang panghuna-huna sang mga katapo sang Partido sa sulod sang hukbo kag mga lokal nga organisasyon masa.

Isa ka matingkad nga kadalag-an sang nagligad nga tuig ang mga pagsuma nga ginhimo sang mga komite sa larangan gerilya kag iban pa nga mga yunit kag organo sang Partido. Halimbawa sini ang pagsuma sang Komite sa Larangan sa Central Negros sa inagihan sini halin 2008 tubtob 2023. Giya ini subong sang nagapamuno nga mga kadre para sa paghimo sang mga plano.

Nahimo man sang mga larangan gerilya ang ila matag-SICA (Social Investigation and Class Analysis ukon Sosyal nga Imbestigasyon kag Pag-analisa sa Sahi) nga nangin giya sa pagpukaw, pag-organisa kag pagpahulag sa mga paghimakas masa. “Ini ang kongkreto nga dagway sang pagpanikasog nga malampuwasan ang sakit sang suhetibismo sa ideolohiya sa dagway sang empirisismo,” suno sa komite sa rehiyon.

Ginreport sang komite ang regular nga mga pagtasa kag paghimo sang maunod nga mga plano agud segurohon ang konsolidasyon sang mga yunit sang Partido sa kaumhan kag kasyudaran. Kadungan sini, tampad nga ginapatigayon ang pagsaway kag pagsaway sa kaugalingon agud labi pa nga pahugton ang paghiliusa sang Partido.

Hilikuton sa pulitika

Napasaka ang kamuklatan sa pulitika kag kahandaan nga makig-away sang masa sa mga pangpulitika nga pagtuon. Nagpatuman ang Partido sang ginpasimple nga mga pamaagi kag mahapos mahangpan nga mga kurso sang pagtuon sang kurikulum sang Pambansa-Demokratikong Paaralan (Padepa), sang mga ginsulat nga artikulo, sosyal nga imbestigasyon, kag mga dokumento sa pagsuma sang rebolusyonaryong inagihan.

Sadtong 2025, mabaskog nga ginpakita sang masa sa kaumhan kag kasyudaran ang ila paghiliusa. Napabuylo sa kaumhan ang kolektibo nga paghimakas para sa reporma sa duta, pagduso sang matarong nga sweldo kag benepisyo sang mga mamumugon sa uma kag imol nga mangunguma. Sa kasyudaran, unod sang mga hublag ang jeepney phaseout, pribatisasyon sang serbisyo sa tubig, kag ang mabaskog nga kahublagan kontra korapsyon.

Nagpagsik man ang kontra-pasista nga paghimakas sang masa batuk sa rehimen US-Marcos. Napanahon kag gilayon nga nagapaguwa sang pahayag ang mga yunit sa isla para ibuyagyag ang kabutigan, saywar kag black propaganda sang rehimen Marcos kag mga tinawo sini. Napaguwa ang mga ini sa radyo, pamantalaan, sa midya sa internet kag sa social media.

Sa armadong paghimakas, aktibo nga napabilin ang lima ka larangan gerilya sa isla sa idalum sang Pangrehiyon nga Kumand sa Operasyon sang BHB (Apolinario Gatmaitan Command). Tayuyon nga ginapalapad ang milisya sang banwa bilang reserba nga pwersa para sa inaway banwa sa kubay sang baseng masa.

Tungod sa mapisan, matutom, kag maalam nga pag-analisa sa sitwasyon militar, hilway kag tayuyon nga makapatuman sang rebolusyonaryong hilikuton ang Partido kag BHB. Naglapad kag nagdako sang 33% ang erya nga ginamainobrahan kag nahulagan sang BHB. Nagdako sang 20% ang organisasyon masa. Likom nga natukod ang mga organo sang gahum pangpulitika sa mga kaumhan sang isla.

Nakalunsar ang hukbo sang banwa sang 44 ka lain-lain nga tipo sang taktikal nga opensiba. Ang pila sa mga ini nalunsar sa mga sentro sang populasyon kag mga lugar nga malapit sa kapitolyo sang mga probinsya sa isla. Sa mga ini, indi magnubo sa 58 ang napatay samtang 21 ang napilasan sa tropa sang militar, pulis, mga pwersang kontra-rebolusyonaryo kag mga malain nga elemento. Sa bahin sang hukbo sang banwa, nalista ang lima ka depensiba nga aksyon. Namartir sa mga ini ang 10 ka mga kaupod.

Sa tayuyon nga pagpatuman sa mga hilikuton nga ini, naka-rekrut sang mga bag-o nga katapo sang Partido nga naglab-ot sa 70% sa bug-os nga isla. Wala sang pangduha-duha nila nga ginabaton ang ila mga katungdanan kag responsibilidad nga pamunuan ang rebolusyonaryong kahublagan sa isla.