Nagpadayon ug walay kakapoy ang mga protesta sulod ug gawas sa Venezuela aron iduso nga ibalik ang ilang presidente nga si Nicolas Maduro ug iyang asawa nga si Cilia Flores sa Venezuela. Si Maduro ug Flores gidagit sa mga tropang Amerikano sa Caracas niadtong Enero 3 ug gidala sa US.

Sulod sa Venezuela, nagsugod ang adlaw-adlaw nga demonstrasyon sa mismong adlaw sa pagdagit kang Maduro ug nagpadayon hangtud sa kasamtangan. Wala nahadlok ug nagpabiling determinado ang estadong Bolivarian nga gipundar nilang Maduro, Hugo Chavez ug mga anti-imperyalistang pwersang Venezuelan. Ilalum sa pagpangulo ni Delcy Rodriguez, gituboy nga temporaryong presidente, napatawag ang nasudnong liderato ug padayong nga miganar ang tanang sangay sa gubyerno. Nakighiusa bisan ang mga oposisyunistang partido, gawas sa lunod-patay nga itoy sa Amerika nga partido ni Maria Machado.

Sa Cuba, tunga sa milyon ang nagmartsa niadtong Enero 19 alang sa libing sa 32 ka sundalong Cubano nga namatay samtang gipanalipdan si Maduro ug Flores niadtong gidagit sila. Lakip ang mga sundalong Cubano sa kapin 100 ka tawong gipatay sa US sa agresyon niini.

Sa Italy, napuloan ka libo ang nagmartsa sa 30 ka syudad niadtong Enero 10 aron makighiusa sa Venezuela ug iduso ang hinanaling pagpalingkawas kang Maduro.

Sa India, nagpagula og resolusyon sa pakighiusa sa Venezuela niadtong Enero 12 ang 10 ka mayor nga oposisyunistang partido pulitikal, lakip ang klase-klaseng mga partido komunista. Gikundena usab nila ang mga hulga sa rehimeng Trump sa Cuba, Mexico, Iran, Colombia ug Greenland. Naglunsad ang mga grupo og serye sa mga protesta sa lain-laing bahin sa India nga gisalmutan sa liboan ka mamumuo, intelektwal ug mag-uuma.