Hugot nga gikundena sa progresibong mga organisasyon sa Pilipinas ug Japan ang Acquisition and Cross-Servicing Agreement (ACSA) nga gipirmahan tali sa Pilipinas ug Japan niadtong Enero 15. Matud sa Bagong Alyansang Makabayan (Bayan), kabahin kini sa “paglalum sa imperyalistang adyenda sa Pilipinas.”

Sumpay ang ACSA sa Reciprocal Access Agreement (RAA) nga nagatugot sa pagpundo sa mga tropang Japanese sa nasud.

“Dili kini (ACSA) pagtibangay sa mga nasud nga adunay pataas nga istatus kundili paghikot sa Pilipinas sa duso sa Tokyo nga subling magmilitarisa ug sa estratehiyang Indo-Pacific sa Washington nga naglaraw nga liyukan ang China,” matud sa Bayan.

Gikundena usab sa Asia-Wide Campaign against US-Japanese Domination and Aggression of Asia (AWC) ang nagkagrabeng militarismo sa Japan.

“Ang angay himuon sa gubyerno sa Japan mao ang mangayo og tinuod nga pasaylo ug maghatag og kumpensasyon sa mga biktima sa okupasyong Japanese sa Pilipinas, dili ang pagpagrabe sa militarisasyon,” matud sa AWC.

Ilalum sa ACSA, pagatugutan ang Japan nga magtipig og pagkaon, sugnod, bala ug uban pang lohistika alang sa kaugalingon niining mga pwersa nga anaa sa Pilipinas aron mosalmot sa mga war games ug uban pang aksyong militar sa takuban sa disaster response ug humanitarian assistance. Dugang sa ACSA, plano usab sa Japan nga makabaton og GSOMIA (General Security of Military Information Agreement) tali niini ug sa Pilipinas.

Dungan sa pagpirma sa ACSA, naghatag ang Japan og limos nga ₱341 milyon nga Official Security Assistance o ayudang militar sa AFP. Nakagahin ang pondo alang sa konstruksyon sa silunganan sa mga sakyanang pangdagat. Gawas dinhi, naghatag usab ang Japan og ₱617 milyong ayuda para kuno sa pagtukod og imprastrukturang pangtelekomunikasyon sa Basilan, Sulu, ug Tawi-Tawi.