Militanteng mibarog ang mga mag-uuma ug mamumuong-panguma sa Hacienda Michaela sa Barangay Talotog, Murcia, Negros Occidental batok sa pagpangilog sa 22-ektaryang yuta sa Ta-ala Farms, Inc. Gikan Enero 12, nagkampo ang mga armadong ginsakpan ug ahente sa kumpanya aron palayason ang mga residente sa ilang yutang ginaugmad.

Niadtong adlawa, midagsang sa asyenda ang mga sakop sa kumpanya sakay sa tulo ka gagmayng trak ug tulo ka backhoe. Ang usa sa mga trak nagsakay og mga armadong gwardya. Nagtukod sila og mga tent ug gikalot ang yutang giugmad gamit ang mga backhoe. Gihadlok, gibaharan ug gitionan nila og pusil ang mga mag-uuma. Gisulayan pa pagposas ang tulo ka babayeng mag-uuma hinungdan nga nasamdan ang usa. Niadtong Enero 14, nagsugod na sa pagtukod og pader ang kumpanya palibot sa giilog niining yuta.

Ang yuta ginaangkon ni Bonnie Ta-ala, tag-iya sa kumpanya human kini “gipalit” gikan sa agalong yutaan nga si Arthur Bayona. Niadtong Oktubre 2025, nagsulay si Tal-ala sa pag-ilog sa yuta apan wala siya milampus.

Matud sa Hacienda Michaela Farmers and Farmworkers Association, iligal ang pagbaligya sa yuta tungod kay langkub kini sa pag-apud-apud sa gubyerno ilalum sa Comprehensive Agrarian Reform Program. Niadtong 2009 pa nagpagula og Notice of Coverage alang sa yuta ang upisina sa Department of Agrarian Reform (DAR) sa Negros Occidental.

Nagpiket niadtong Enero 20 ang Kilusang Magbubukid ng Pilipinas-Negros ug National Federation of Sugar Workers atubangan sa DAR Negros Island Region sa Bacolod City aron batikuson ang kalangan sa DAR sa pag-apud-apud sa yuta. Matud sa grupo, subli na usab nga gibutyag sa insidente ang kadunot sa reporma sa yuta sa estado ug padayon nga kabangis sa pyudal nga paghari sa mga agalong yutaan sa nasud.

Dakung suporta ang nadawat sa mga mag-uuma sa Hacienda Michaela gikan sa mga grupo sa kabatan-onan, artista ug uban pa.