Walay puas ang mga pagpangabuso sa militar sa katawhang Pilipino pagsulod sa 2026. Gikan sa ikaduhang semana sa Enero, nataho ang mga kaso sa pagpamusil, sulayng pagdagit, pagpasaka og mga kasong kriminal, pagpamig-ot ug uban pang paglapas sa tawhanong katungod.

Sa Samar, gipabuthan og M203 ug girakrakan sa mga sundalo sa 46th IB ang duha ka batang managsuon sa Sityo San Pedro, Barangay 3, San Jose de Buan niadtong Enero 3 sa hapon. Naghakot ang duha og uling dihang masugatan ang tulo ka sundalo ug kalit na lang silang gipabuthan.

Naigo sa dughan, kamot ug tiil ang manghod ug nabiyaan sa nahitaboan. Wala na nahibaloan sa pamilya ang nahitabo sa bata nga hangtud karon wala pa makita. Samtang, ang magulang luwas nga nakadagan.

Sa Negros Occidental, gisulayan sa mga pwersa sa 15th IB nga dagiton ang usa ka development workers sa Paghidaet sa Kauswagan Development Group Inc. (PDG) ug kaabag sa mga mag-uuma sa pagsukol sa Hacienda Asia Plantation Inc (HAPI). Matud sa taho, nagabyahe sakay sa motorsiklo si Joselito Macapobre sa Barangay Caningay, Candoni dihang kalit siyang giharang sa itum nga sakyanan niadtong Enero 17. Nakaikyas si Macapobre ug nakadagan sa duul nga kabalayan ug nangayo og tabang sa mga residente. Ayha ang insidente, pipila ka beses nang giadtoan sa mga sundalo sa 15th IB ang biktima sa iyang balay ug giakusahang rekruter sa Bagong Hukbong Bayan.

Nataho usab ang pagpanghadlok sa mga sundalo kang Analyn Mirano, myembro usab sa PDG Inc niadtong Enero 16 ug 17.

Nataho usab ang mga kaso sa pagpanghasi ug intimidasyon sa mga barangay sa Kabankalan City, Himamaylan City, La Castellana, ug Moises Padilla gikan sa ikaduhang semana sa Enero. Gipatawag ang mga residente aron pugson silang “mosurender.”

Sa Negros Oriental, pipila ka adlaw nga nagkampo sa Kambairan Elementary School sa Barangay Trinidad, Guihulngan City ang 50 ka sundalo sa 62nd IB gikan Enero 6. Gitugaw usab sa mga sundalo ang pipila ka barangay sa Canlaon City.

Sa Metro Manila, gipasakahan og reklamong sedisyon ug uban pang kaso ang pangulo sa Bagong Alyansang Makabayan nga si Renato Reyes Jr, midya pangkampus nga si Jacob Baluyot, ug 32 pa sa sulayng pahilumon ug palurangon ang mga protesta kontra korapsyon.