Sa giya sa kalihukang pagtul-id, padayon ang paningkamot sa Komiteng Rehiyon sa Partido Komunista ng Pilipinas sa Isla sa Negros aron palalumon ug palapdon ang pag-ugat niini sa masang Negrosanon. Niadtong 2025, gitaho sa komite ang relatibong pagbuntog sa napunting nga mga kahuyangan. Tungod niini, malampusong napangulohan sa Partido ang mga pakigbisog sa masang anakpawis ug mga demokratikong sektor sa mga syudad, lungsod, ug kabanikanhan, ug ang pagpakusog sa mga yunit sa Bagong Hukbong Bayan (BHB) sa lima ka natarang gerilya sa isla.

Pagpanday sa ideolohiya

Mahukmanong nagpatuman ang komite sa mga simpleng pamaagi sa pagtudlo samtang napabiling maundanon ang mga pagtuon aron konsolidahon ang mga myembro sa Partido. Nakalunsad kini og mga pagtuon sa Batakan ug Intermedyang Kurso sa Partido. Padayon usab ang kampanya aron tun-an ang Kursong Oryentasyon ug Konstitusyon sa Partido.

Kolektibo usab nga gitun-an sa mga Partidista ang mga memorandum ug advisory sa nahataas nga mga organo ug sa rehiyon. Naghatag kini og kahayag sa paglihok ug pagpatuman sa mga plano, batay sa kongkretong kahimtang sa gubat sa katawhan sa isla ug sa tibuok nasud.

Gibasa ug hiniusang gitun-an ang nasudnon, rehiyunal ug ang-ang nataran nga mga rebolusyonaryong mantalaan, dyornal ug folio sama sa Ang Bayan, Rebolusyon, Ang Paghimakas, Ispading, Ang Budyong ug Ngurob. Nakatabang kini sa pagpalapad sa panghunahuna sa mga myembro sa Partido sulod sa hukbo ug mga lokal na organisasyong masa.

Usa ka tataw nga kadaugan sa milabayng tuig ang mga pagsumada nga gitibuok sa mga komite sa natarang gerilya ug uban pang mga yunit ug organo sa Partido. Pananglitan niini ang pagsumada sa Komiteng Larangan sa Central Negros sa kasinatian niini gikan 2008 hangtud 2023. Giya kini karon sa nangulong mga kadre alang sa pagtibuok og mga plano.

Natibuok usab sa mga natarang gerilya ang tagsa-tagsa nilang SICA (Social Investigation and Class Analysis) nga nahimong giya sa pagpukaw, pag-organisa ug pagpalihok sa masa. “Kini ang kongkretong porma sa paningkamot nga mapatigbabawan ang sakit sa suhetibismo sa ideolohiya sa dagway sa empirisismo,” matud sa komite sa rehiyon.

Gitaho sa komite ang regular nga mga pag-ases ug pagtibuok sa undanon nga mga plano aron siguruhon ang konsolidasyon sa mga yunit sa Partido sa kabanikanhan ug kasyudaran. Dungan niini, matinud-anong gihimo ang pagsaway ug pagsaway-sa-kaugalingon aron labaw pang pahugton ang panaghiusa sa Partido.

Gimbuhaton sa pulitika

Napataas ang kahimatngon sa pulitika ug kaandam sa masa nga mosukol pinaagi sa mga pulitikanhong pagtuon. Nagpatuman ang Partido og gipasimpleng mga pamaagi ug daling masabtan nga mga kurso sa pagtuon sa kurikulum sa Pambansa-Demokratikong Paaralan (Padepa), sa mga gisulat nga artikulo, katilingbanong imbestigasyon, ug mga dokumento sa pagsumada sa rebolusyonaryong kasinatian.

Niadtong 2025, napakita sa masa sa kabanikanhan ug kasyudaran ang ilang panaghiusa. Napabwelo sa kabanikanhan ang kolektibong pakigbisog alang sa reporma sa yuta, pagduso sa makatarunganong suhulan ug benepisyo sa mga mamumuong-panguma ug kabus nga mag-uuma. Sa kasyudaran, tataw ang mga protesta batok sa jeepney phaseout, pribatisasyon sa serbisyo sa tubig, ug ang kusog nga kalihukang kontra korapsyon.

Milagsik usab ang anti-pasistang pakigbisog sa masa batok sa rehimeng US-Marcos. Tukma sa panahon ug dali nga nagpagula og pamahayag ang mga yunit sa isla aron ibutyag ang bakak, saywar ug black propaganda sa rehimeng Marcos ug mga sakop niini. Napagula kini sa radyo, dyaryo, sa midya sa internet ug sa social media.

Sa armadong pakigbisog, aktibong nakamantini ang lima ka natarang gerilya sa isla ilalum sa Panrehiyong Kumand sa Operasyon sa BHB (Apolinario Gatmaitan Command). Padayon nga gipalapad ang milisyang bayan isip reserbang pwersa alang sa gubat sa katawhan sa han-ay sa baseng masa.

Tungod sa kugihan, madasigon, ug maalam nga pagtuki sa sitwasyong militar, gawasnon ug padayon nga nakapatuman sa rebolusyonaryong gimbuhaton ang Partido ug BHB. Milapad ug midaku og 33% ang eryang namaniobrahan ug nalihukan sa BHB. Midaku og 20% ang kusog sa organisadong masa. Tago nga natukod ang mga organo sa pulitikanhong gahum sa kabanikanhan sa isla.

Nakalunsad ang hukbong bayan og 44 ka lain-laing tipo sa taktikal nga opensiba. Pipila niini nalunsad sa mga sentro sa populasyon ug mga lugar nga duul sa kapitolyo sa mga prubinsya sa isla. Dinhi, dili moubos sa 58 ang napatay samtang 21 ang nasamdan sa tropa sa militar, pulis, mga pwersang kontra-rebolusyon ug dautang elemento. Sa hukbong bayan, nataho ang lima ka depensibang aksyon. Namartir dinhi ang 10 ka kauban.

Sa padayon nga pagpatuman sa mga gimbuhaton, nakarekrut og mga bag-ong myembro sa Partido nga mikabat sa halos 70% sa tibuok isla. Walay pagduhaduha nilang gidawat ang ilang mga tahas ug responsibilidad nga pangulohan ang rebolusyonaryong kalihukan sa isla .