Waray hunong an mga militar nga pangabuso kontra ha katawhan Pilipino pagsulod han 2026. Tikang ikaduha nga semana han Enero, nahilista an mga kaso han panmusil, gin-atentar nga pagsikmit, pagsalawad han mga kaso nga kriminal, pan-gigipit ngan iba pa nga pagtalapas ha tawhanon nga katungod.

Ha Samar, ginpabuthan han M203 ngan ginpanmusil han mga sundalo han 46th IB an duha nga kabataan nga magbugto ha Sityo San Pedro, Barangay 3, San Jose de Buan hadton Enero 3 han kulop. Naghahakot an duha han igbaraligya nga uring han makahitapo an tulo nga sundalo ngan tigda na la hira nga ginpabuthan.

Naigo ha dughan, kamot ngan siki an manghud nga bugto ngan nahibayaan ha lugar han panmusil. Waray na nahibaruan han pamilya an nahingadtuan han bata nga hasta yana nawawara. Samtang, an magurang nga bugto talwas nga nakadalagan.

Ha Negros Occidental, gin-atentar han mga pwersa han 15th IB nga sikmiton an usa nga trabahador pankalibsugan han Paghidaet sa Kauswagan Development Group Inc. (PDG) ngan kabulig han mga parag-uma ha pag-ato ha Hacienda Asia Plantation Inc (HAPI). Sigon ha report, nabiyahe sakay han motorsiklo hi Joselito Macapobre ha Barangay Caningay, Candoni han tigda hiya nga ulangon han usa nga itom nga sarakyan hadton Enero 17. Nakaeskapo hi Macapobre ngan nakadalagan ha hirani nga kabalayan ngan inaro hin bulig ha mga residente. Antes an insidente, pira kabeses na nga ginkadto han mga sundalo han 15th IB an biktima ha iya balay ngan gin-akusahan nga rekruter han Bagong Hukbong Bayan.

Samtang, nahireport liwat an panhadlok han mga sundalo kan Analyn Mirano, usa pa nga membro han PDG Inc hadton Enero 16 ngan 17.

Nahireport liwat an mga kaso han panringgal ngan intimidasyon ha mga barangay ha Kabankalan City, Himamaylan City, La Castellana, ngan Moises Padilla tikang ikaduha nga semana han Enero. Ginpapatawag an mga residente para piriton hira nga “sumurender.”

Ha Negros Oriental, pira kaadlaw nga nagkampo ha Kambairan Elementary School ha Barangay Trinidad, Guihulngan City an 50 nga sundalo han 62nd IB tikang Enero 6. Ginriringgal liwat han mga sundalo an pira nga barangay ha Canlaon City.

Ha Metro Manila, ginsalawdan hin reklamo nga sedisyon ngan iba pa nga kaso an presidente han Bagong Alyansang Makabayan nga hi Renato Reyes Jr, mamamahayag nga pankampus nga hi Jacob Baluyot, ngan 32 nga iba pa ha pag-atentar nga pamingawon ngan pahupain an mga protesta kontra korapsyon.