Dirudiretso ngan waray kapagal an mga protesta ha sakob ngan gawas han Venezuela para ig-insister nga igbalik an ira presidente nga hi Nicolas Maduro ngan iya asawa nga hi Cilia Flores ha Venezuela. Hi Maduro ngan Flores ginsikmit han mga tropa nga Amerikano ha Caracas hadton Enero 3 ngan gindara ha US.

Ha sakob han Venezuela, nagtikang an adlaw-adlaw nga demonstrasyon ha adlaw mismo han pagsikmit kan Maduro ngan nagpapadayon hasta ha presente. Waray mabantad ngan nagpapabilin nga bug-os an estado nga Bolivarian nga ginpundar nira Maduro, Hugo Chavez ngan mga kontra-imperyalista nga pwersa nga Venezuelan. Ilarum han pamumuno ni Delcy Rodriguez, ginbutang nga temporaryo nga presidente, nahipatawag an nasyunal nga pamunuan ngan padayon nga naandar an ngatanan nga sanga han gubyerno. Nakig-usa bisan an mga oposisyunista nga partido, labot ha lunod-patay nga niyutiyo han Amerika nga partido ni Maria Machado.

Ha Cuba, katunga kamilyon an nagmartsa hadton Enero 19 para ha paglubong han 32 nga sundalo nga Cubano nga namatay samtang gindedepensahan hi Maduro ngan Flores han sikmiton hira. Kaupod an mga sundalo nga Cubano ha masobra 100 katawo nga ginpatay han US ha agresyon hini.

Ha Italy, narunapulo kayukot an nagmartsa ha 30 nga syudad hadton Enero 10 agud makig-usa ha Venezuela ngan ig-insister an layon nga pagpapagawas kan Maduro.

Ha India, nagpagawas hin resolusyon han pakikig-usa ha Venezuela hadton Enero 12 an 10 nga mayor nga oposisyunista nga pulitikal nga partido, kaupod an dirudilain nga mga partido komunista. Ginkundenar liwat nira ang mga hulga han rehimen Trump ha Cuba, Mexico, Iran, Colombia ngan Greenland. Naghimo an mga grupo hin serye han mga paggios ha magkalain-lain nga parte han India nga ginpartisiparan han yukut-yukot nga trabahador, intelektwal ngan parag-uma.