Ha giya han kagiusan pagtutul-id, dirudiretso an paningkamot han Komite ha Rehiyon han Partido Komunista ng Pilipinas ha Isla han Negros agud pahilarumon ngan pahiluagon an paggamot hini ha masa nga Negrosanon. Hadton 2025, ginreport han komite an relatibo nga pag-ungbaw ha natudlok nga mga kaluyahan. Bunga hini, madinaugon nga napamunuan han Partido an mga pakigbisog han masa nga anakbalhas ngan mga demokratiko nga sektor ha mga syudad, bungto, ngan kabaryuhan, ngan an pagpapakusog han mga yunit han Bagong Hukbong Bayan (BHB) ha lima nga prente gerilya ha isla.

Pagpapanday ha ideolohiya

Mapagdesisyon nga nagpatuman an komite han mga simple nga pamaagi han pagtutdo samtang nagpapabilin nga maundanon an mga pag-aram agud konsolidahon an mga kaapi han Partido. Nakaglansar ini hin mga pag-aram ha Batakan ngan Intermedya nga Kurso han Partido. Dirudiretso liwat an kampanya agud adman an Kurso nga Oryentasyon ngan Konstitusyon han Partido.

Kolektibo liwat nga gin-adman han mga Partidista an mga memorandum ngan advisory han hiruhitaas nga mga organo ngan han rehiyon. Naghatag ini hin lamrag ha paggios ngan pagpapatuman han mga plano, basar ha kongkreto nga kamutangan han gerra han katawhan ha isla ngan ha bug-os nga nasud.

Ginbasa ngan urusa nga gintalakay an nasyunal, panrehiyon ngan balitang han prente nga mga rebolusyunaryo nga mantalaan, dyornal ngan folio sugad han Ang Bayan, Rebolusyon, Ang Paghimakas, Ispading, Ang Budyong ngan Ngurob. Nakabulig ini ha pagpapahiluag han panhunahuna han mga kaapi han Partido ha sakob han hukbo ngan mga lokal nga organisasyon masa.

Usa nga landaw nga kadaugan ha naglabay nga tuig an mga sumada nga ginbug-os han mga komite ha prente gerilya ngan iba pa nga mga yunit ngan organo han Partido. Pananglitan hini an sumada han Komite ha Prente ha Central Negros ha eksperyensya hini tikang 2008 tubtub 2023. Giya ini yana han namumuno nga mga kadre para ha pagbubug-os han mga plano.

Nabug-os liwat han mga prente gerilya an kada tagsa nira nga SICA (Social Investigation and Class Analysis o Pankatilingban nga Imbestigasyon ngan Pag-analisar ha Klase) nga nagin giya ha pagpupukaw, pag-oorganisa ngan pagpapagios ha mga panmasa nga pakigbisog. “Ini an kongkreto nga porma han paningkamot nga malapayan an sakit han suhetibismo ha ideolohiya ha porma han empirisismo,” sigon ha komite ha rehiyon.

Ginreport han komite an regular nga mga pag-ases ngn pagbubug-os han maundanon nga mga plano agud seguruhon an konsolidasyon han mga yunit han Partido ha kabaryuhan ngan kasyudaran. Kadungan hini, tangkod nga ginhimo an pagsuson ngan pagsuson-ha-kalugaringon agud mas pahugton pa an pagkakaurusa han Partido.

Buruhaton ha pulitika

Naisa an kapukawan ha pulitika ngan kaandaman nga umato han masa ha mga pampulitika nga pag-aram. Nagpatuman an Partido han ginpasimple nga mga pamaagi ngan masayon santupon nga mga kurso han pag-aram han kurikulum han Pambansa-Demokratikong Paaralan (Padepa), han mga ginsurat nga artikulo, pankatilingban nga imbestigasyon, ngan mga dokumento han pagsusuma han rebolusyunaryo nga eksperyensya.

Hadton 2025, makusog nga ginpakita han masa ha kabaryuhan ngan kasyudaran an ira pagkaurusa. Napabuylo ha kabaryuhan an kolektibo nga pakigbisog para ha reporma ha tuna, pagduduso han makatadungan nga suhol ngan benepisyo han mga trabahador ha uma ngan kablas nga parag-uma. Ha kasyudaran, landaw an mga paggios kontra ha jeepney phaseout, pribatisasyon han serbisyo ha tubig, ngan an hiluag nga kagiusan kontra korapsyon.

Nagrayhak liwat an kontra-pasista nga pakigbisog han masa kontra ha rehimen US-Marcos. Napapanahon ngan dagmit nga nagpagawas hin pahayag an mga yunit ha isla agud ibuksas an buwa, saywar ngan black propaganda han rehimen Marcos ngan mga tawuhan hini. Nahipagawas ini ha radyo, dyaryo, ha midya ha internet ngan ha social media.

Ha armado nga pakig-away, aktibo nga nakapagpabilin an lima nga prente gerilya ha isla ilarum han Panrehiyon nga Kumand ha Operasyon han BHB (Apolinario Gatmaitan Command). Dirudiretso nga ginpahiluag an milisya han katawhan komo reserba nga pwersa para ha gerra han katawhan ha ranggo han base panmasa.

Tungod ha maduroto, mauyatom, ngan baltok nga pag-analisar ha sitwasyon militar, talwas ngan dirudiretso nga nakapagpatuman hin rebolusyunaryo nga buruhaton an Partido ngan BHB. Naghiluag ngan nagdako hin 33% an erya nga namamaniobrahan ngan nagigiusan han BHB. Dinako hin 20% an kusog han organisado nga masa. Sikreto nga nahitukod an mga organo han pampulitika nga poder ha mga kabaryuhan han isla.

Nakaglansar an hukbo han katawhan hin 44 nga magkalain-lain nga tipo han taktikal nga opensiba. An pira hini nahilansar ha mga sentro han populasyon ngan mga lugar nga hirani ha kapitolyo han mga prubinsya ha isla. Hini, diri mamenos ha 58 an napatay samtang 21 an nasamaran ha tropa han militar, pulis, mga pwersa nga kontra-rebolusyon ngan magraut nga elemento. Ha gapil han hukbo han katawhan, nahilista an lima nga depensiba nga aksyon. Namartir dinhi an 10 nga mga kasama.

Ha dirudiretso nga pagpapatuman hini nga mga buruhaton, nakagrekrut han mga bag-o nga kaapi han Partido nga inabot ha haros 70% ha bug-os nga isla. Waray pagruhaduha nira nga ginkarawat an ira mga buruhaton ngan responsabilidad nga pamunuan an rebolusyunaryo nga kagiusan ha isla.