Militante nga nanindugan an mga parag-uma ngan trabahador ha uma han Hacienda Michaela ha Barangay Talotog, Murcia, Negros Occidental kontra ha panlulupot han 22-kaektarya nga tuna han Ta-ala Farms, Inc. Tikang Enero 12, nagkampo an mga armado nga tawuhan ngan ahente han kompaniya agud palayason an mga residente ha ira tuna nga gin-uuma.

Hiton nga adlaw, sinulong ha asyenda an mga tawuhan han kompaniya sakay han tulo nga gudti nga trak ngan tulo nga backhoe. An usa ha mga trak mayda sakay nga mga armado nga gwardya. Nagtindog hira han mga tent ngan gin-ukab an tuna nga umhanan gamit an mga backhoe. Ginhadlok, gintarhug ngan gintagaan nira hin pusil an mga parag-uma. Gin-atentar pa nga posasan an tulo nga kababayin-an nga parag-uma nga ginkasamad han usa. Hadton Enero 14, nagtikang na nga magtindog hin pader an kompaniya ha palibot han gin-agaw hini nga tuna.

An tuna gin-aangkon ni Bonnie Ta-ala, tag-iya han kompaniya kahuman “paliton” ini han kompaniya tikang ha agaron maytuna nga hi Arthur Bayona. Hadton Oktubre 2025, nag-atentar na nga luputon ni Tal-ala an tuna kundi waray hiya magmanilampuson.

Sigon ha Hacienda Michaela Farmers and Farmworkers Association, iligal an pagbaligya ha tuna tungod kay ginlupgop ini han panhatag han gubyerno ha ilarum han Comprehensive Agrarian Reform Program. Hadton 2009 pa nagpagawas han Notice of Coverage para ha tuna an upisina han Department of Agrarian Reform (DAR) ha Negros Occidental.

Nagpiket hadton Enero 20 an Kilusang Magbubukid ng Pilipinas-Negros ngan National Federation of Sugar Workers ha atubangan han DAR Negros Island Region ha Bacolod City agud suknaon an kamahinay han DAR ha distribusyon han tuna. Sigon ha grupo, utro na liwat nga ginbuksas han insidente an kadunutan han reporma ha tuna han estado ngan padayon nga kamadarahug han pyudal nga paghahadi han mga agaron maytuna ha nasud.

Paluyu-luyo nga suporta an nakarawat han mga parag-uma han Hacienda Michaela tikang ha mga grupo han kabatan-unan, artista ngan iba pa.