Mahugot nga ginkundenar han progresibo nga mga organisasyon ha Pilipinas ngan Japan an Acquisition and Cross-Servicing Agreement (ACSA) nga ginpirmahan giutan han Pilipinas ngan Japan hadton Enero 15. Sigon ha Bagong Alyansang Makabayan (Bayan), kaparte ini han “paghilarum han imperyalista nga adyenda ha Pilipinas.”

Kadugtong an ACSA ha Reciprocal Access Agreement (RAA) nga nagtutugot han pag-istasyon han mga tropa nga Japanese ha nasud.

“Diri ini (ACSA) bubligay han mga nasud nga mayda magkatupong nga pusisyon kundi paghihigot ha Pilipinas ha duso han Tokyo nga utro nga magmilitarisa ngan ha estratehiya nga Indo-Pacific han Washington nga nagtutumuyo nga palibutan an China,” sigon ha Bayan.

Ginkundenar liwat han Asia-Wide Campaign against US-Japanese Domination and Aggression of Asia (AWC) an natikagrabe nga militarismo han Japan.

“An kinahanglan himuon han gubyerno han Japan mag-aro han tinuod nga pasaylo ngan maghatag hin kumpensasyon ha mga biktima han Japanese nga okupasyon ha Pilipinas, diri an pagpapagrabe han militarisasyon,” sigon ha AWC.

Ilarum han ACSA, tutugutan an Japan nga mag-istak hin pagkaon, sungo, bala ngan iba pa nga lohistika para ha kalugaringon hini nga mga pwersa nga aada ha Pilipinas agud pumartisipar ha mga war games ngan iba pa nga aksyon militar ha tahub han disaster response ngan humanitarian assistance. Dugang ha ACSA, plano liwat han Japan nga magkamayda hin GSOMIA (General Security of Military Information Agreement) giutan hini ngan han Pilipinas.

Kadungan han pirmahay han ACSA, naghatag an Japan hin limos nga ₱341 kamilyon nga Official Security Assistance o panmilitar nga ayuda ha AFP. Nakaalutaga an pondo para ha konstruksyon han darangpan han mga sarakyan nga pandagat. Labot pa hini, naghatag an Japan hin ₱617 kamilyon nga ayuda para kunuhay ha pagtindog han pantelekomunikasyon nga imprastruktura ha Basilan, Sulu, ngan Tawi-Tawi.