Susrunod nga mga protesta ngan katitirok an ginlansar han magkalain-lain nga sektor ha pag-abre han 2026 agud ipasulong an ira mga katungod ha ekonomiya ngan pulitika. Ha syahan nga mga semana han Enero, nahilansar an mga paggios para ha katungod ha tuna ngan pangisdaan, barikada kontra mina ngan demolisyon, ngan iba pa para ha pag-undong han panginabuhi.

Parag-uma ngan minoriya nga katawhan. Nagpapadayon an barikada kontra mina han mga residente han Barangay Bitnong, Dupax del Norte, Nueva Vizcaya ha luyo han utro nga pag-atentar han Woggle Corporation ngan mga pulis nga bungkagon ini hadton Enero 13. Aada ha 317 nga pulis an sinulong agud bungkagon an han-ay han taghimaryo. Napakyas ini nga mga pag-atentar nga makasulod han ulangon han masobra 50 nga residente an agian. Dirudiretso an suporta ha barikada han mga tagdepensa han kalibungan, tawo ha singbahan ngan mga progresibo nga magbaralaud.

Parupangisda. Nagmartsa tipakadto ha Department of Environment and Natural Resources ha Quezon City an Pambansang Lakas ng Kilusang Mamamalakaya ng Pilipinas hadton Enero 19 agud tipahan an ginhihimo nga dredging ngan reklamasyon ha magkalain-lain nga parte han nasud. Nagprotesta liwat ha baybayon han Navotas City an Pamalakaya-Navotas hadton Enero 15 kontra ha 650 kaektarya nga Navotas Coastal Bay Reclamation Project han San Miguel Corporation ngan lokal nga gubyerno han Navotas.

Trabahador. Nagprotesta an mga trabahador han San Fernando Coca-Cola Rank and File Union ha planta han Coca-Cola ha Barangay Baliti, San Fernando, Pampanga hadton Enero 16. Ginsukna han unyon an Coca-Cola Europacific Aboitiz Philippines ha mga pagtalapas hini ha mga probisyon ha ira collective bargaining agreement.

Mga drayber ngan tsuper. Nagprotesta hadton Enero 19 an mga membro han Piston ha atubangan han Department of Transportation ha Quezon City agud utro nga ig-insister an layon nga pagpapabasura ha buwa nga Public Utility Vehicle Modernization Program ngan pagpapabalik ha 5-katuig nga indibidwal nga prangkisa. Kadungan han paggios an mass filing (tinagdamo nga pagsalawad) para ha renewal han mga indibidwal nga prangkisa han mga drayber ngan opereytor nga waray magpailarum ha konsolidasyon. Ha tantiya han grupo, sumobra-kumulang 500,000 nga tsuper ngan opereytor an nawarayan na hin pakabuhi tungod ha palpak nga programa nga “modernisasyon.”

Parupaninda ngan kablas. Hadton Enero 12, nagmartsa ngadto ha Pasay City Hall an aada ha 200 nga membro han Wowee Market Vendors Associaction agud igpanawagan an utro nga pag-abre han ira merkado. Imbes nga atubangon ni Mayor Emi Calixto-Rubiano, nagtago hiya ha upisina, samtang nagpatukar hin makusog nga tukar an iya mga tawuhan agud lumuson an panawagan han mga parupaninda. Gintarhug pa hira han mga pulis nga bobombahon han tubig.

Hiton liwat nga adlaw, kinadto ha Department of Social Work and Development ha Quezon City an mga residente han kablas nga komunidad nga gindestroso ha nakalabay nga mga bagyo agud sukton an kagawaran ha kumpensasyon nga kinahanglan ginpanhatag hini. Ha pangunguna han Kadamay, demanda nira nga makigdayalogo ha sekretaryo han ahensya kundi waray hira atubangon hini.

Ha Rizal, nagprotesta an mga asosasyon ilarum han Taytay Urban Poor Alliance ngan Kadamay-Rizal ha Baltao Gate, Ortigas Avenue, Taytay hadton Enero 11. Nanawagan hira han dagmit nga pagpapaundang ha iligal nga pagkokodal han Baltao Corporation ha mga residente han Sityo Igiban, Barangay San Isidro ha Taytay. Sumobra-kumulang 60 nga pamilya an gindadarahug han kompaniya.

Mga magturutdo. Nagpiket an Alliance of Concerned Teachers (ACT) ha Department of Budget and Management ha Manila hadton Enero 16 agud igpanawagan an pagpapagawas han nadelatar nga mga benepisyo, ipasulong an mahinungdanon nga dugang nga sweldo ngan dugang nga badyet para ha regularisasyon ngan benepisyo han mga magturutdo ngan trabahador ha sektor han edukasyon.

Hadton Enero 9, nanawagan liwat an grupo ha pagpabasura ha gintatawag nga “classroom observation,” Result-based Management System (RPMS) ngan iba pa nga suklanan ngan rekisito nga gintatalaan agud suklon an kalidad han pagpatuman han mga magturutdo nga nagpapakuri ha ira. Gin-iinsister nira ini kasunod han pagkamatay han magturutdo ha Muntinlupa City nga hi Agnes Buenaflor hadton Enero 7. Nahirantok an ulo ni Buenaflor han madismayo samtang naghihimo han “classroom observation.” Nadara pa hiya ha ospital kundi namatay gihapon ha dayuday.

Ha Centro Escolar University, dirudiretso an protesta han CEU Faculty and Allied Workers Union agud ig-insister an mahinungdanon nga dugang nga sweldo ngan benepisyo ha ira CBA. Ginkadismaya han unyon an pagpagawas han Department of Labor and Employment hin assumption of jurisdiction ha talaan nga adlaw han ira plano nga welga hadton Enero 13. Magwewelga unta an unyon tungod ha deadlock ha negosasyon ha CBA tikang pa Septyembre 2025.

Trabahador pankalibsugan. Nagprotesta ha Quezon City an mga trabahador pankalibsugan tikang ha upat nga ospital han gubyerno hadton Enero 14. Ginsukna nira an rehimen Marcos ha diri paghatag han ira tinuig nga alawans ngan iba pa nga mga benepisyo. Utro liwat hira nga nanawagan nga pahitas-on an batakan nga sweldo han mga trabahador pankalibsugan ngan tapuson an kontraktwalisasyon.

Migrante nga trabahador nga Pilipino. Pinartisipar an masobra 1,000 nga Pilipino nga nars ha welga han mga nars ilarum han New York State Nurses Association hadton Enero 12 ha New York City. Kaparte hira han 15,000 nga nars tikang ha napulo nga pribado nga ospital ilarum han Presbyterian, Mount Sinai, ngan Montefiore. Nanawagan hira para ha dugang nga sweldo, benepisyo ngan proteksyon tikang ha kamadarahug ha lugar han trabaho.

Mga kabatan-unan. Gintapo han mga kabatan-unan ngan estudyante an pagtitikang han klase yana nga 2026 ha paglalansar han mga protesta ha kampus hini nga Enero. Ginpalandaw hini nga mga paggios an isyu han edukasyon, akademiko nga kalibrihan, hiluagan nga korapsyon ngan pasismo han rehimen US-Marcos. Ginhimo an mga paggios ha mga kampus han University of the Philippines, Saint Louis University, Far Eastern University, De La Salle University-Manila, Ateneo de Manila University, University of Santo Tomas, Technological University of the Philippines-Manila ngan iba pa nga unibersidad.