Agsasaruno a protesta ken taripnong ti inruswat ti nadumaduma a sektor iti panaglukat ti 2026 tapno iyabante dagiti karbengan da iti ekonomya ken pulitika. Kadagiti umuna a lawas ti Enero, naisayangkat dagiti tignay para iti karbengan ti daga ken pagkalapan, barikada kontra minas ken demolisyon ken dadduma pay a panangitandudo iti pagbiagan.

Mannalon ken katutubo nga umili. Agtultuloy ti barikada kontra mina dagiti residente ti Barangay Bitnong, Dupax del Norte, Nueva Vizcaya iti laksid ti balbaliw a panaggandat ti Woggle Corporation ken dagiti pulis a dupraken ti daytoy idi Enero 13. Adda ti 317 a pulis ti dimmarup tapno dupraken ti intar ti bumaryo. Napaay ti gandat dagitoy a makastrek idi hinarang ti nasurok 50 a residente ti dalan. Agtultuloy ti suporta iti barikada dagiti salaknib ti kalikasan, tao’t simbaan ken dagiti progresibo a mammanday-linteg.

Mangngalap. Nagmartsa ti Pambansang Lakas ng Kilusang Mamamalakaya agturong iti Department of Environment and Natural Resources idiay Quezon City idi Enero 19 tapno supyaten ti maar-aramid a dredging ken reklamasyon iti nadumaduma a paset ti pagilyan. Nagprotesta met ti Pamalakaya-Navotas iti igid-baybay ti Navotas City idi Enero 15 laban iti 650 ektarya a Navotas Coastal Bay Reclamation Project ti San Miguel Corporation ken lokal a gubyerno ti Navotas.

Mangmangged. Nagprotesta dagiti mangmangged ti San Fernando Coca-Cola Rank and File Union iti planta ti Coca-Cola idiay Barangay Baliti, San Fernando, Pampanga idi Enero 16. Binatikos ti unyon ti Coca-Cola Euro-Pacific Aboitiz Philippines kadagitoy a panaglabsing kadagiti probisyon iti collective bargaining agreement.

Dagiti drayber ken opereytor. Nagprotesta dagiti kameng ti Piston iti sango ti Department of Transportation idiay Quezon City idi Enero 19 tapno balbaliw nga irupir ti madagdagus a panangibasura iti ubbaw a Public Utility Vehicle Modernization Program ken panangisubli iti 5-tawen nga indibidwal a prangkisa. Kagiddan ti tignay ti mass filing para iti renewal dagiti indibidwal a prangkisa dagiti drayber ken opereytor a saan a pimmauneg iti konsolidasyon. Iti tantya ti grupo, nasurok-kumurang 500,000 a drayber ken opereytor ti naawanan ti pagbiagan gapu iti palpak a programa a “modernisasyon.”

Aglaklako ken nakurapay. Idi Enero 12, nagmartsa agturong idiay Pasay City Hall ti agarup 200 a kameng ti Wowee Market Vendors Association tapno iyawag ti balbaliw a panaglukat ti palengke da. Imbes a sangwen isuda, naglemmeng ni Meyor Emi Calixto-Rubiano iti upisina na, bayat a nagpatokar ti napigsa a musika dagiti tauhan na tapno lumned ti awag dagiti aglaklako. Pinangtaan pay isuda dagiti pulis a bombaen ti danum.

Didiay met laeng nga aldaw, nagturong iti Department of Social Work and Development idiay Quezon City dagiti residente ti nakurapay a komunidad a nadangran kadagiti napalabas a bagyo tapno singiren ti departamento iti kumpensasyon a rumbeng nga ibunong daytoy. Iti panangiyuna ti Kadamay, tarigagay da a makidayalogo iti kalihim ti ahensya ngem saan na a sinango isuda.

Idiay Rizal, nagprotesta dagiti timpuyog iti sidong ti Taytay Urban Poor Alliance ken Kadamay-Rizal iti Baltao Gate, Ortigas Avenue, Taytay idi Enero 11. Immawag da ti madagdagus a panangpasardeng iti iligal a panagipupok ti Baltao Corporation kadagiti residente ti Sityo Igiban, Barangay San Isidro idiay Taytay. Nasurok-kumurang 60 a pamilya ti rangranggasan ti kumpanya.

Dagiti manursuro. Nagpiket ti Alliance of Concerned Teachers (ACT) iti Department of Budget and Management idiay Manila idi Enero 16 tapno iyawag ti panagiruar kadagiti natantan a benepisyo, itandudo ti naan-anay a nayon a sweldo ken nayon a badyet para iti regularisasyon ken benepisyo dagiti manursuro ken mangmangged iti sektor ti edukasyon.

Idi Enero 9, immawag met ti grupo iti panagibasura iti maaw-awagan a “classroom observation,” Result-based Management System (RPMS) ken dadduma pay a pagrukodan ken rekisito a maitudtuding tapno rukoden ti kalidad ti panagakem dagiti mangisursuro, banag a mangparparigat kadakwada. Inrupir da daytoy kalpasan a matay ti maysa a manursuro idiay Muntinlupa City a ni Agnes Buenaflor idi Enero 7. Naitugtog ti ulo ni Buenaflor idi natalimudaw bayat nga agiyar-aramid ti “classroom observation.” Naitaray pay isuna iti ospital ngem natay met laeng.

Idiay Centro Escolar University, tuluy-tuloy ti protesta ti CEU Faculty and Allied Workers Union tapno irupir ti nainkalintegan a nayon sweldo ken benepisyo iti CBA da. Nadismaya ti unyon iti panangiruar ti Department of Labor and Employment ti assumption of jurisdiction iti naituding nga aldaw a plano da nga agwelga idi Enero 13. Agwelga koma ti unyon gapu iti deadlock iti negosasyon iti CBA manipud pay Setyembre 2025.

Mangmangged iti salun-at. Nagprotesta idiay Quezon City dagiti mangmangged iti salun-at manipud iti uppat nga ospital ti gubyerno idi Enero 14. Binatikos da ti rehimen Marcos iti saan a panangited ti tinawen nga alawans ken dadduma pay a benepisyo da. Balbaliw met nga immawag da nga ingato ti basaran a sweldo dagiti mangmangged ken gibusan ti kontraktwalisasyon.

Migrante a mangmangged a Pilipino. Nakitipon ti nasurok 1,000 Pilipino a nars iti welga dagiti nars iti sidong ti New York State Nurses Association idi Enero 12 idiay New York City. Isuda ket paset ti 15,000 a nars manipud iti sangapulo a pribado nga ospital iti sidong ti Presbyterian, Mount Sinai ken Montefiore. Immawag da para iti nayon a sweldo, benepisyo ken proteksyon manipud iti kinaranggas iti pagtrabahuan da a lugar.

Dagiti kabataan. Sinabat dagiti kabataan ken estudyante ti panagrugi ti klase tatta 2026 iti panangisayangkat kadagiti protesta iti kampus tatta Enero. Naipalatak kadagitoy a tignay ti isyu ti edukasyon, akademiko a wayawaya, nasaknap a korapsyon ken pasismo ti rehimen US-Marcos. Naaramid dagiti tignay kadagiti kampus ti University of the Philippines, Saint Louis University, Far Eastern University, De La Salle University-Manila, Ateneo de Manila University, University of Santo Tomas, Technological University of the Philippines-Manila ken dadduma pay nga unibersidad.