Awan sarday dagiti panagabuso a militar laban iti umili a Pilipino iti panagserrek ti 2026. Manipud maikadwa a lawas ti Enero, nailista dagiti kaso ti pammaltog, gandat a panagdukot, panagipila kadagiti kaso a kriminal, panaglipit ken dadduma pay a panaglabsing iti karbengan-tao.

Idiay Samar, pinasabugan ti M203 ken pinalto-paltogan dagiti soldado ti 46th IB ti dua nga ubbing nga agkabsat idiay Sityo San Pedro, Barangay 3, San Jose de Buan idi Enero 3 ti malem. Ti dua nga ubbing ket agbunbunag ti ilako da nga uging idi masabat da ti tallo a soldado ken kellaat laengen a pinaputukan da isuda.

Napuntaan iti barukong, ima ken saka ti ading ken naibati iti lugar ti pammaltog. Saanen a naamwan ti pamilya ti napasamak iti ubing nga agingga iti agdama ket mapukpukaw. Kabayatanna, ti manong na ket natalged a nakataray.

Idiay Negros Occidental, ginandat dagiti pwersa ti 15th IB a dukoten ti maysa a mangmangged ti Paghidaet sa Kauswagan Development Group Inc. (PDG) ken katulong dagiti mannalon iti Hacienda Asia Plantation Inc (HAPI). Segun iti ulat, agbibyahe a nakalugan ti motorsiklo ni Joselito Macapobre idiay Barangay Caningay, Candoni idi kellaat isuna a hinarang ti maysa a nangisit a lugan idi Enero 17. Nakalibas ni Macapobre ken nakataray asideg iti kabalbalayan ken dimmawat ti tulong kadagiti residente. Sakbay ti insidente, manon a daras a sinarungkaran dagiti soldado ti 15th IB ti biktima iti balay na ken inakusaran da a rekruter ti New People’s Army.

Kabayatanna, naiyulat met ti pammutbuteng dagiti soldado ken Analyn Mirano, maysa pay a kameng ti PDG Inc idi Enero 16 ken 17.

Naiyulat met dagiti kaso ti panagriribuk ken pammutbuteng kadagiti barangay ti Kabankalan City, Himamaylan City, La Castellana ken Moises Padilla manipud maikadwa a lawas ti Enero. Mapapaawagan dagiti residente tapno piliten isuda a “sumuko.”

Idiay Negros Oriental, mano nga aldaw a nagkampo iti Kambairan Elementary School iti Barangay Trinidad, Guihulngan City ti 50 soldado ti 62nd IB manipud Enero 6. Riniribuk met dagiti soldado ti mano a barangay idiay Canlaon City.

Iti Metro Manila, nadatagan ti reklamo a sedisyon ken dadduma pay a kaso ti pangulo ti Bagong Alyansang Makabayan a ni Renato Reyes Jr, peryodista a pangkampus a ni Jacob Baluyot ken 32 pay iti gagem a paulimeken ken pagtalnaen dagiti protesta kontra korapsyon.