Mmilitante a timmakder dagiti mannalon ken mangmangged-talon ti Hacienda Michaela idiay Barangay Talotog, Murcia, Negros Occidental laban iti panag-agaw ti 22-ektarya a daga ti Ta-ala Farms, Inc. Manipud Enero 12, nagkampo dagiti armado a tauhan ken ahente ti kumpanya tapno pagtalawen dagiti residente iti daga a taltalonen da.

Kadagidiay nga aldaw, dimmarup iti asyenda dagiti tauhan ti kumpanya a nakalugan iti tallo a babassit a trak ken tallo a backhoe. Ti maysa kadagiti trak ti nangilugan kadagiti armado a gwardya. Nagitakder da kadagiti tolda ken kinali da babaen ti backhoe ti daga a taltalon. Binutbuteng, pinangtaan ken tinutukan da ti paltog dagiti mannalon. Ginandat da pay a posasan ti tallo a babbai a mannalon a nakasugatan ti maysa. Idi Enero 14, nangrugin nga agitakder ti pader ti kumpanya iti aglikmot ti inagaw da a daga.

Ti daga ket tagtagikwaen ni Bonnie Ta-ala, a makinbagi iti kumpanya kalpasan a “gatangen” daytoy ti kumpanya manipud iti apo’t daga a ni Arthur Bayona. Idi Oktubre 2025, ginandaten ni Tal-ala nga agawen ti daga ngem saan a nagballigi.

Segun iti Hacienda Michaela Farmers and Farmworkers Association, iligal ti panagilako iti daga gapu ta sinakop daytoy ti panagibunong ti gubyerno iti sidong ti Comprehensive Agrarian Reform Program. Idi 2009 pay a nagiruar ti Notice of Coverage para iti daga ti upisina ti Department of Agrarian Reform (DAR) idiay Negros Occidental.

Nagpiket idi Enero 20 ti Kilusang Magbubukid ng Pilipinas-Negros ken National Federation of Sugar Workers iti sango ti DAR Negros Island Region idiay Bacolod City tapno babalawen ti kinabuntog ti DAR iti panagibunong ti daga. Segun iti grupo, inparang manen ti insidente ti kinabulok ti reporma iti daga ti estado ken ti agtultuloy a kinaranggas ti pyudal a panagari dagiti apo’t daga iti pagilyan.

Agsusumbangir a suporta ti naawat dagiti mannalon ti Hacienda Michaela manipud kadagiti grupo ti kabataan, artista ken dadduma pay.