Iti tarabay ti tignay panagilinteg, tuluy-tuloy ti panagpinget ti Komite ti Rehiyon ti Communist Party of the Philippines iti Isla ti Negros tapno paunegen ken palawaen ti panagramut daytoy iti masa a Negrosanon. Idi 2025, inyulat ti komite ti relatibo a panagrimbaw kadagiti natudo a pagkapuyan. Bunga daytoy, balligi a naidaulwan ti Partido dagiti dangadang ti masa nga anakling-et ken dagiti demokratiko a sektor kadagiti syudad, ili ken kaaw-awayan, kasta met ti panagpapigsa dagiti yunit ti New People’s Army (NPA) iti lima a larangan gerilya iti isla.

Panagpanday iti ideolohiya

Ti komite ket mapangngeddeng a nagipatungpal kadagiti simple a pamuspusan ti panagisuro bayat a napagtalinaed a nabagas dagiti panagadal tapno konsolidaen dagiti kameng ti Partido. Nakaisayangkat daytoy kadagiti panagadal iti Batayan ken Intermedya a Kurso ti Partido. Tuluy-tuloy met ti kampanya tapno pagadalan ti Kurso nga Oryentasyon ken Konstitusyon ti Partido.

Kolektibo met nga inadal dagiti Partidista dagiti memorandum ken advisory dagiti nangatngato nga organo ken ti rehiyon. Nangted lawag daytoy iti panagtignay ken panagipatungpal kadagiti plano, basar iti kongkreto a kasasaad ti gubat ti umili iti isla ken iti intero a pagilyan.

Binasa ken sangsangkamaysa a tinalantan da dagiti nailyan, pangrehiyon ken tukad larangan a rebolusyonaryo a pagiwarnak, dyornal ken folio kas ti Ang Bayan, Rebolusyon, Ang Paghimakas, Ispading, Ang Budyong ken Ngurob. Nakatulong daytoy iti panagpalawa iti kapanunotan dagiti kameng ti Partido iti uneg ti hukbo ken kadagiti lokal nga organisasyon ti masa.

Maysa a nalatak a balligi iti napalabas a tawen dagiti panaglagom a binukel dagiti komite iti larangan gerilya ken dadduma pay a yunit ken organo ti Partido. Maysa nga ehemplo ditoy ket ti panaglagom ti Komiteng Larangan iti Central Negros iti kapadasan daytoy manipud 2008 aginga 2023. Agserserbi tatta daytoy a tarabay dagiti mangidadaulo a kadre iti panangbukel kadagiti plano.

Nabukel met dagiti larangan gerilya dagiti SICA (Social Investigation and Class Analysis wenno Panagsukisok iti Gimong ken Panagamiris iti Dasig) a nagbalin a tarabay iti panagriing, panagorganisa ken panagpatignay kadagiti dangadang ti masa. “Daytoy ti kongkreto a langa ti panangikagumaan a marimbawan ti sakit ti suhetibismo iti ideolohiya iti langa ti empirisismo,” segun iti komite ti rehiyon.

Inyulat ti komite dagiti regular a panagtasa ken panagbukel kadagiti nabagas a plano tapno siguraduen ti konsolidasyon dagiti yunit ti Partido iti kaaw-awayan ken kasyudadan. Kagiddan dagitoy, napudno nga inyaramid da ti panagdillaw ken panagdillaw-iti-bagi tapno ad-adda a pairuten ti panagkaykaysa ti Partido.

Trabaho iti pulitika

Kadagiti pangpulitika nga innadal, naingato ti pangpulitika a kamulatan ken kinasagana a lumaban ti masa. Nagipatungpal ti Partido kadagiti pinasimple a pamuspusan ken nalaka a matarusan a kurso ti panagadal ti kurikulum ti Pambansa-Demokratikong Paaralan (Padepa), dagiti naisurat nga artikulo, panggimong nga imbestigasyon ken dagiti dokumento ti panaglagom ti rebolusyonaryo a kapadasan.

Idi 2025, napigsa nga inpakita ti masa iti kaaw-awayan ken kasyudadan ti panagkaykaysa da. Naibwelo iti kaaw-awayan ti kolektibo a dangadang para iti reporma iti daga, panagiduron ti nainkalintegan a sweldo ken benepisyo dagiti mangmangged-talon ken nakurapay a mannalon. Iti kasyudadan, nalatak dagiti tignay laban iti jeepney phaseout, pribatisasyon ti serbisyo iti danum.

Rimmegta met ti anti-pasista a dangadang ti masa laban iti rehimen US-Marcos. Napapanawen ken naalibtak a nagiruar ti pablaak dagiti yunit iti isla tapno ibunannag ti kinaulbod, saywar ken black propaganda ti rehimen Marcos ken dagiti tauhan daytoy. Nairuar dagitoy iti radyo, dyaryo, iti midya iti internet ken iti social media.

Iti armado a dangadang, aktibo a nakapagtalinaed ti lima a larangang gerilya iti isla iti sidong ti Pangrehiyon a Kumand iti Operasyon ti NPA (Apolinario Gatmaitan Command). Tuluy-tuloy a pinalawa da ti milisyang bayan kas reserba a pwersa para iti gubat ti umili iti intar ti base a masa.

Gapu iti nagaget, naanep ken nasirib a panagamiris iti sitwasyon militar, nawaya ken tuluy-tuloy a nakaipatungpal ti rebolusyonaryo a trabaho ti Partido ken NPA. Limmawa ken dimmakkel iti 33% ti erya a mamanmaniobraan ken matigtignayan ti NPA. Dimmakel ti 20% ti pigsa ti organisado a masa. Limed a naitakder dagiti organo ti bileg iti pulitika kadagiti kaaw-awayan ti isla.

Nakairuswat ti hukbo ti umili ti 44 a nadumaduma a tipo ti taktikal nga opensiba. Mano ditoy ti naisayangkat kadagiti sentro ti populasyon ken kadagiti lugar nga asideg iti kapitolyo dagiti prubinsya iti isla. Kadagitoy, saan a bumaba iti 58 ti napatay bayat a 21 ti nasugatan iti tropa ti militar, pulis, dagiti pwersa a kontra-rebolusyon ken dakes nga elemento. Iti paset ti hukbo ti umili, nairekord ti lima a depensiba nga aksyon. Namartir ditoy ti 10 a kakadwa.

Iti tuloy-tuloy a panagipatungpal kadagitoy a trabaho, nakarekrut da kadagiti baro a kameng ti Partido a dimmanon iti dandani 70% iti intero nga isla. Awan ti panagdudua nga inawat da dagiti rebbengen ken responsibilidad nga idaulwan ti rebolusyonaryo a tignay iti isla.