Tuloy-tuloy ken awan-pannakabannog dagiti protesta ti umili iti uneg ken ruar ti Venezuela tapno irupir nga isubli ti presidente da a ni Nicolas Maduro ken ti asawa na a ni Cilia Flores idiay Venezuela. Ni Maduro ken Flores ket dinukot dagiti tropa nga Amerikano idiay Caracas idi Enero 3 ken inpan da idiay US.

Iti uneg ti Venezuela, nangrugi ti inaldaw a demonstrasyon iti mismo aldaw a nadukot ni Maduro ken agtultuloy agingga iti agdama. Saan a nagungon ken agtaltalinaed a solido ti estado a Bolivarian nga inpundar da Maduro, Hugo Chavez ken dagiti Venezuelan nga anti-imperyalista a pwersa. Iti panangidaulo ni Delcy Rodriguez, naituding a temporaryo a presidente, naipaawag ti nailyan a liderato ken agtultuloy nga agan-andar ti amin a sangay ti gubyerno. Nakikaykaysa uray dagiti oposisyunista a partido, malaksid iti napeklan nga aso-aso ti Amerika a partido ni Maria Machado.

Idiay Cuba, kagudwa a milyon ti nagmartsa idi Enero 19 para iti punpon ti 32 a soldado a Cubano a pimmusay bayat a salsalakniban da ni Maduro ken Flores idi madukot dagitoy. Kabilang dagiti soldado a Cubano iti nasurok 100 tao a pinatay ti US iti agresyon daytoy.

Idiay Italy, pinullo a ribo ti nagmartsa iti 30 syudad idi Enero 10 tapno makikaykaysa iti Venezuela ken ipaganetget ti madagdagus a panangruk-at ken Maduro.

Idiay India, nagiruar ti resolusyon ti pannakikaykaysa iti Venezuela ti 10 mayor nga oposisyunista a partido pulitikal, kabilang ti nadumaduma a partido komunista idi Enero 12. Kinundenar da met dagiti pangta ti rehimen Trump iti Cuba, Mexico, Iran, Colombia ken Greenland. Nagiyaramid dagiti grupo ti serye dagiti tignay iti nadumaduma a paset ti India a dinar-ayan ti rinibo a mangmangged, intelektwal ken mannalon.