Nainget a kinundenar dagiti progresibo nga organisasyon iti Pilipinas ken Japan ti Acquisition and Cross-Servicing Agreement (ACSA) a pinirmaan ti Pilipinas ken Japan idi Enero 15. Segun iti Bagong Alyansang Makabayan (Bayan), paset daytoy ti “panagadalem ti imperyalista nga adyenda iti Pilipinas.”

Ti ACSA ket kasilpo ti Reciprocal Access Agreement (RAA) a mangipalpalubos iti panagtalinaed dagiti tropa a Japanese iti pagilyan.

“Ti ACSA ket saan a kooperasyon dagiti pagilyan nga addaan patas a saad nu di ket panangigalut iti Pilipinas iti duron ti Tokyo a balbaliw nga agmilitarisa ken iti estratehiya nga Indo-Pacific ti Washington nga agpangpanggep a palikmutan ti China” segun iti Bayan.

Kinundenar met ti Asia-Wide Campaign against US-Japanese Domination and Aggression of Asia (AWC) ti kumarkaro a militarismo ti Japan.

“Ti rumbeng nga aramiden ti gubyerno ti Japan ket dumawat ti pudno a pammakawan ken mangted ti kumpensasyon kadagiti biktima ti okupasyon ti Japanese iti Pilipinas, saan a ti panangpapigsa ti militarisasyon,” segun iti AWC.

Iti sidong ti ACSA, mapalubosan ti Japan nga agibati ti taraon, sungrod, bala ken dadduma pay a lohistika para iti bukod daytoy a pwersa nga adda iti Pilipinas tapno makipaset kadagiti war games ken dadduma pay nga aksyon militar iti linged ti disaster response ken humanitarian assistance. Nayon iti ACSA, balak met ti Japan a maputar ti GSOMIA (General Security of Military Information Agreement) iti baet da iti Pilipinas.

Kagiddan ti panagpinnirma iti ACSA, nangted ti Japan ti limos a ₱341 milyon nga Official Security Assistance wenno ayuda a militar iti AFP. Ti pondo ket nakailatang para iti konstruksyon ti paglinongan dagiti lugan a pangbaybay. Malaksid ditoy, nangted ti Japan ti ₱617 milyon nga ayuda para kano iti panangitakder ti imprastruktura a pangtelekomunikasyon idiay Basilan, Sulu ken Tawi-Tawi.