Duha ka yunit sa mga Pulang manggugubat sa Bagong Hukbong Bayan (BHB) ang nakahuman sa magkasunod nga pagbansay militar niadtong Nobyembre sa mga gerilyang nataran sa Southern Tagalog. Napahigayon ang mga pagbansay taliwala sa mga focused military operation sa pwersang militar ug pulis sa mga nataran sa rehiyon.

Milungtad og 7-10 ka adlaw ang pagbansay. Gisalmutan kini sa mga nag-una ug segundaryong upisyal sa BHB, mga manggugubat, lakip ang mga pwersa sa milisyang bayan.

Matud ni Ka Guillen, upisyal sa pulitika sa usa sa mga yunit, “Lampos ang atong pagbansay luyo sa grabeng operasyon sa kaaway. Napataas nato ang kapasidad ug determinasyon sa mga Pulang manggugubat aron suklan ug hampakon ang hambog nga kaaway.”

Langkub sa pagbansay ang pagtuon sa batakang mga taktika ug teknika sa indibidwal nga pagdepesa, pamilyarisasyon sa mga armas ngadto sa aktwal nga pagpabuto sa mga pusil. Nagbansay ang mga segundaryo ug nag-unang upisyal sa pagkumand.

Sa pagpanguna sa mga upisyal, gisiguro ang organisadong paglihok pinaagi sa mga maniobra pareho sa opensiba ug depensibang panagsangka. Nakab-ot usab ang pagpataas sa ang-ang sa kusog ug resistensya sa matag manggugubat pinaagi sa pag-ehersisyo kada adlaw.

Ang pagbansay labaw nga nagpalig-on sa pagtinabangay ug panag-uban sa matag myembro sa yunit sa BHB. Pagtapos ni Ka Guillen, “Nakasiguro kita nga labaw nga mapalig-on ang atong panaghiusa samtang koordinado kitang motikang paabante sa atong pakigbisog.”