Duha ka yunit sang mga Pulang hangaway sang Bagong Hukbong bayan (BHB) ang nakatapos sa pasunod nga paghanas militar sadtong Nobyembre sa mga larangan gerilya sa Southern Tagalog. Natigayon ang mga paghanas sa tunga sang mga focused military operation sang pwersa militar kag pulis sa mga larangan sa rehiyon.

Naglawig sang 7-10 ka adlaw ang paghanas. Gintambungan ini sang mga nagapanguna kag sekundaryo nga upisyal sang BHB, mga hangaway, pati sang mga pwersa sang milisyang bayan.

Sandig kay Ka Guillen, upisyal pampulitika sang isa sa mga yunit, “Madinalag-on ang aton paghanas sa pihak sang mabaskog nga operasyon sang kaaway. Napataas naton ang kapasidad kag kabubut-on sang mga Pulang hangaway para batuan kag han-usan ang hambog nga mga kaaway.”

Sakop sang paghanas ang pagtuon sa sandigan nga mga taktika kag teknika sa indibidwal nga pakig-away, pamilyarisasyon sa pag-uyat sang armas tubtob aktwal na nga pagpalupok sang mga pusil. Naghanas ang mga sekundaryo kag nagapanguna nga upisyal sa pagkumand.

Sa pagpanguna sang mga upisyal, ginsegurado ang organisado nga paghulag paagi sa mga maniobra sa opensiba kag depensiba nga inaway. Naangkon man ang pagpataas sang lebel sang kusog kag resistensya sang tagsa nga hangaway paagi sa adlaw-adlaw nga ehersisyo.

Ang paghanas ang ilabi nga nagpabakod sa binuligay kag pag-upod sang tagsa ka katapo sang yunit sang BHB. Pagtakop ni Ka Guillen, “Makasiguro kita nga ilabi pa mapabakod ang aton pag-isa samtang koordinado kita nga nagatikang pasulong sa aton nga paghimakas.”