Gipaulanan og bala sa mga sundalo sa 88th IB ang mga Lumad nga silang Levi, Jemboy ug usa ka wala ginganlan sa Sityo Takukon, Barangay Indalasa, Malaybalay City, Bukidnon niadtong Nobyembre 17 sa buntag. Anaa sa lasang ang tulo para manguha og duryan dihang kalit na lang silang gipamusil sa mga sundalo.

Bun-og, samad ug troma ang naangkon sa mga biktima tungod sa paturatoy nga pagdagan ug pag-agi sa pangpang para lang makaluwas. Human ang insidente, gipanghinambog sa 88th IB nga nakakumpiska og usa ka armas sa ginapagawas nga engkwentro niini sa Bagong Hukbong Bayan.

Pagka ugma, nagreklamo ang lider-lumad sa lugar nga si Datu Andihal sa barangay ug miatubang sa mga sundalo sa 88th IB nga nagakampo sa Barangay Indalasa apan wala siya gitagad.