Malinong nga nakapalapit kag ginpalukpan sang mga Pulang hangaway sang Bagong Hukbong Bayan (BHB) sa Negros ang duha ka detatsment sang militar sadtong nagligad nga semana.

Sadtong Disyembre 13, ginpalukpan sang BHB-Central Negros ang patrol base sang 62nd IB sa Barangay Sandayao proper, Guihulngan City, Negros Oriental alas 8:00 sang gab-e. Duha ang napilasan sa tropa sang 62nd IB.

Sadto naman Disyembre 11, ginpalukpan sang BHB-Southwest Negros ang detatsment sang 15th IB sa Sityo Pangi, Barangay Inayawan, Cauayan, Negros Occidental. Malinong nga ginpalapitan sang yunit sang hangaway sang banwa ang detatsment para bulabogon ang nagapahuway nga mga suldado.

Ang mga ini ang kabahin sang apat ka bulan nga abereyds nga armadong opensiba sang mga yunit sang BHB sa isla sang Negros sa nagligad tuig. Maathag nga tampa ini sa pahayag sang 3rd ID nga ngakaubos na ang hangaway sang banwa sa isla kag maangkon na ang target nga lubos “dugmukon” ang BHB.