Gindumdom paagi sang mga kumperensya kag pangkultura nga palagwaon ang una nga tuig sang pagkamartir ni Kaupod Jose Maria Sison, dungganon nga lider, manunudlo kag komunistang Pilipino.

Nagtipon sa University of the Philippines (UP)-Diliman ang ginatos ka indibidwal, pareho nga mga beterano nga aktibista kag pamatan-on, para sa isa ka talakayan kag repleksyon sa mga sinulat ni Ka Joma. Gintiguluhan nga “Reflections on Palestine, the Philippines, and the Struggle for a Just and Lasting Peace,” naghatag sang mga repleksyon ukon personal nga paglaragway ang mga dinapit sang aktibidad sa mga sinulat ni Ka Joma kabahin ang “Our Urgent Tasks,” artikulo sa agresyon kag masaker sang Israel sa pumuluyong Palestino, mga sinulat sa estoryahanay pangkalinong sa tunga sang NDFP kag GRP, “On Revolutionary Violence,” ang iya ulihi nga pahayag nga “Hindi magagapi ang demokratikong rebolusyon ng sambayanang Pilipino.”

Sa Utrecht, The Netherlands, nagtipon ang mga kaupod kag abyan sang rebolusyonaryong kahublagan sa Pilipinas sa upisina sang NDFP International kung sa diin lutaw ang mga pamulong-pulong, kanta, pagbasa sang tula kag iban pa nga tipo sang kultural nga pasundayag para dumdumon ang madinuagon kag mahinungdanon nga kabuhi ni Ka Joma.

Ginlunsar man sang mga yunit sang Partido Komunista ng Pilipinas kag Bagong Hukbong Bayan sa bilog nga pungsod ang nagkalain-lain nga aktibidad para dumdumon kag pasidunggan si Ka Joma. Sa pila ka larangan, gindungan sa amo man nga adlaw ang liwat nga pagsumpa sa bandera sang partido para pabakuron ang bug-os tagipusuon nga pag-alagad sa pumuluyong Pilipino kag paghalad sang kabuhi sa pagdaog sang demokratiko nga rebolusyon sang banwa.