Ginhiwat sang rebolusyonaryong kahublagan sa India, sa pagpamuno sang Communist Party of India (Maoist), ang ika-23 nga anibersaryo sang armadong butkon sini, ang People’s Liberation Guerilla Army, sugod Disyembre 2 tubtob Disyembre 8. Gintukod ang PLGA sadtong Disyembre 2, 2000. kadungan sini, gindumdom man sang rebolusyonaryong kahublagan sa India ang pagkamatay sang tatlo ka myembro sang komite Sentral sang ila Partido sadtong Disyembre 2, 1999.

Subong nga tuig, gindeklrar man sang CPI-maoist ang semana bilang Palestine People’s Struggle Action Week. Pagpakig-isa ini sa makasaysayan nga paghimakas sang pumuluyong Palestino batuk sa pagpanakop kag henosidyo sang Zionistang Israel, nga suportado sang imperyalismong US.

Sandig sa Komite Sentral sang CPI (Maoist), makatarunganon ang armado nga pagbato sang pumuluyong Palestino batuk sa pagpanakop kag nagakadapat ini nga suportahan. Dapat kuno nga maghulag ang mga pumuluyo para pasabton ang mga kriminal sa gyera sang Zionistang Israel.

“Sa amon nga pungsod, ginadumulian sang pasistang si Modi, pareho ni Netanyahu sang Israel, nga nagasulong sang dikta sang imperyalistang US, ang bisan ano nga oposisyon sa ila nga tindog sa nagaluntad nga henosidyo sa mga Palestino,” pahayag ni Kaupod Amrut, tigpamaba sang CPI (Maoist) sa internasyunal nga hambalanon.