Ginpatay sa patarasak nga pagpaniro sang mga suldado sang 74th IB ang mangunguma nga si Pido Mendes sa Barangay San Jose, Mapanas, Northern Samar sadtong Nobyembre 22. Nagapatuman sang isa ka focused military operation ang nasambit nga yunit nga napaidalom sa kumand ni BGen. Noel Vestuir sang 802nd IBde.

Sugod 2013, ginalagas na si Medes, 60, sang mga suldado pagkatapos siya makapalagyo sa pagpangdakop sang 34th IB. Sugod sadto, nagapuyo na siya sa iya nga ulumhan sa bukid para likawan ang mga suldado.

Pag-aresto. Pagkatapos sang ginpagwa nga engkwentro sang 94th IB, gin-aresto sang mga suldado ang mangunguma nga si Pokoy Rebradilla, upod ang iya bata, sa Sityo Karanawan-Buli, Barangay Buenavista, Himamaylan City, Negros Occidental sadtong Disyembre 7. Ginpaidalom siya sa tortyur kag iligal nga ginbilanggo sa kampo sini sa Barangay Tambo, Ayungon, Negros Oriental.

Pag-abdak. Gin-abdak sadtong Disyembre 18 kag ginpresenta bilang “surrenderee” sadtong Disyembre 19 sang 11th IB ang duha ka nagabusong nga hors de combat nga mga hangaway sang Bagong Hukbong Bayan (BHB)-Southeast Negros. Ginkuha sila sa Siaton, Negros Oriental kag kasamtangan nga ginatago sang militar.

Militarisasyon. Nagtambak sang pila ka gatos ka tropa militar ang 62nd IB sa Binalbagan kag kasikbit nga mga banwa sa Negros Occidental sugod sadtong Disyembre 9. Katuyuan sini nga pahipuson kag sumpuon ang mga himata kag residente sa ila panawagan nga hustisya para kay Braulio “Banny” Tubalado nga ginpatay sang mga suldado sadtong Disyembre 6.

Masobra 100 ka suldado sang 62nd IB ang naga-operasyon sa Sityo Sunflower sa Barangay Santol kag Sityo Tambo, Barangay Amuntay, pareho sa Binalbagan. Sapilitan nga ginpabakwit sang mga suldado ang 15 ka pamilya halin sa Sityo Karanawan, Barangay Amuntay sadtong Disyembre 9. Naglab-ot sa 100 katawo ang apektado sang pagpabakwit, kabahin ang mga bata.

Pagpang-ipit. Arbitraryo nga gindetine kag gindeport sang rehimen US-Marcos si Edna Bacher, Filipina-Swiss nga aktibista kag tigpangulo sang Anakbayan-Switzerland, sadtong Disyembre 7. Ginbilanggo siya sang masobra duha ka oras sa NAIA Terminal 3 bag-o pwersahan nga ginpabalik sa Switzerland. Ginbutang siya sa “blacklist” ukon mga ginadumilian nga magsulod sa pungsod tuga sang iya kuno “kontra-gubyerno nga mga aktibidad.” Isa si Becher sa mga aktibista nga nagprotesta batuk kay Marcos Jr sa Switzerland sadtong Enero.

Sa Bicol, gina-ipit sang 903rd IBde si Reynard Magtoto, myembro sang National Union of Journalists of the Philippines kag tigpamahayag sang Baretang Bikolnon.

Samtang, nagpyansa sadtong Disyembre 18 ang duha ka lider-masa sa Cebu sa kaso nga frustrated homicide nga ginpasaka sang militar. nagpyansa sila ni John Ruiz III, koordineytor sang Bayan Muna Central Visayas, kag Jhonggie Rumol pagkatapos mahibal-an ang kaso nga nagadalahig sa ila sa armado nga engkwentro sang BHB kag AFP sa Toboso, Negros Occidental sadtong Abril.