Abtik nga rali sang KM. Makahas nga ginlunsar sang Kabataang Makabayan (KM) ang abtik-protesta sa kalawigon sang Recto Avenue sa Manila sadtong Disyembre 10. Naglunsar man sang abtik nga rali ang KM-Southern Tagalog sa UP-Los Baños sadtong Disyembre 19. Ginlunsar nila ini sa tunga sang pagbutang sang rehimen US-Marcos sa organisasyon sa listahan sang mga “terorista nga organisasyon.” Ang rali ang kabahin sang kahiwatan sa ika-59 nga anibersaryo sang KM sadtong Nobyembre 30.

Pagpangkakas sa Converge ICT. Batuk ang mga mamumugon sang Converge ICT sa pagkakas sa 600 ka mamumugon sang Metroworks (utod nga kumpanya sang Converge) sa bilog nga Metro Manila sadtong Nobyembre. Nagpiket sila sa Regional Conciliation ang Mediation Board-NCR sa Quezon Avenue, Quezon City sadtong Disyembre 6 kadungan sang paghukom sa “redundancy program” kag “cost-cutting” sang kumpanya nga Converge ICt. Ginapanag-iyahan ang kumpanya ni Dennis Anthony Uy nga taga-Angeles City.

Petisyon kontra NTF-Elcac sa Negros. Nagprotesta sa atubang sang lokal nga Commission on Human Rights sa Bacolod City sadtong Disyembre 7 ang mga mangunguma kag imol nga Negrosanon para iduso ang hinanali nga pagbungkag sa National Task Force-Elcac. Kadungan sini, nagpasaka sila sang pormal nga petisyon kag nakigdayalogo sa mga upisyal sang ahensya. Ginpirmahan sang 1,500 ka mangunguma kag imol ang petisyon. Ginpangunahan sang pagpetisyon sang Human Rights Advocates Negros kag Kilusang Magbubukid ng Pilipinas-Negros.

Pribatisado nga serbisyo sa patubig sa Bulacan, ginsaway. Nagprotesta sa atubang sang upisina sang Water District sa Barangay Minuyan III, San Jose del Monte, Bulacan ang mga katapo kag tigsuporta sang Alliance for Consumers Protection-CSJDM sadtong Diyembre 11 para sawayon ang malain nga serbisyo kag nagasinampaw pa nga mga sulukton sini sa mga konsyumer. Ginsapribado ang serbisyo nga patubig sugod sadtong Mayo 2018 sang nagsulod ang lokal nga gubyerno sa joint venture agreement upod ang PrimeWater Infrastructure Corporation, ginapanag-iyahan sang pamilya Villar.

Mga mangingisda sang Sorsogon, madinalag-on. Napakakas sang mga mangingisda sa Gubat, Sorsogon ang pila sa anti-mangingisda nga probisyon sa Fishery Administrative Order No. 264 sang Bureau of Fisheries and Aquatic Resources sadtong Disyembre 11 matapos ang pagpetisyon kag ululupod nga kahublagan sang Save gubat bay Movement sugod pa sang Hunyo. Liwat na sila nga matugutan nga mangisda sang mga king crab nga indi makatarunganon nga gindumili sang ahensya.