Ang ulihi nga mga binulan sang tuig 2023 ang ginkakitaan sang mas ilabi kadasig nga paglala sang krisis sang malakolonyal kag malapyudal nga nagahari nga sistema sa idalom sang paantus, papet kag pasista nga rehimen US-Marcos. Wala-puas ang pagtaas sang presyo sang mga balaklon, pag-usmod sang ekonomiya, paglala sang korapsyon, kag pagdako sang utang sang gubyerno.

Bunga sang mga paantus nga patakaran sang rehimen Marcos, padayon nga nagalubha ang kahimtangan sang kabuhi sang masang Pilipino, paglala sang disempleyo, pag-agaw sa palangabuhian, kawad-on sang palangitan-an, manubo nga sweldo, kapigaduhon kag gutom.

Sa pihak nga bahin, padayon nga pagbato kag protesta ang sabat sang nagkalain-lain nga sektor sa pagpa-antus kag pagpamigos sa ila sang rehimen US-Marcos. Sining nagligad nga mga semana, pasunod nga untat-byahe kag mga hublag-protesta ang ginlunsar sa bilog nga pungsod batuk sa nagahilapit nga pagpatuman sang mga tikang nga magadingot sa kinamatarung sa palangabuhian sang ginatos ka linibo nga mga drayber kag opereytor sang dyip. Magluwas diri, tayuyon man nga naga-abante ang mga pagbato sang nagkalain-lain nga mga demokratikong sektor pareho sang mga mamumugon, mangunguma, mangingisda, manunudlo, mamumugon pang-ikaayong lawas, pamatan-on nga estudyante kag iban pa para sa ila mga demanda pang-ekonomiya kag panawagan pampulitika.

Ang amat-amat nga nagapagsik nga pagbato nga ini ang sigurado nga magadasig sa mga masunod nga binulan sa magaabot nga tuig, kadungan sang ginalauman nga pag-usmod sang tadtad-sa-krisis nga sistema sa idalom sang paghari sang rehimen US-Marcos. Magluwas sa mga hambalanon pang-ekonomiya ukon palangabuhian, pihak kag pihak pa nga mga hambalanon pampulitika, pareho sang pagtukod sang bag-o nga mga base militar sang US, charter change, mga paglapas sa tawhanon nga kinamatarung, kag iban pa ang pihu nga magaduso sang nagadamo kag nagadako nga mga hublag-protesta sa kadalanan, talakayan sang banwa kag pagsangkad sang organisado nga kubay sang masa.

Sa masunod nga tuig, dapat ubos-kusog kag makahas nga magtigayon sang hilikuton masa ang mga pungsodnon-demokratiko nga pwersa agud mas sangkad pa nga malab-ot kag epektibo nga pamunuan ang masa sa ila mga paghimakas. Sistematiko kag wala-kakapoy nga lab-uton ang pinakamalapad nga kubay sang masa. Tukuron ang ginatos ka mga guban para mag-organisa kag magpropaganda sa masa. Padayon sila nga hanason kag armasan para pataason ang ikasarang kag pauswagon ang mga pamaagi sa pagpamuno sa masa. Dapat ilunsar nila sa kada adlaw ang mga pampulitika nga talakayan kag mga aktibidad agud pataason ang ila ihibalo kag kamuklatan kag patalumon ang ila huna-huna sa pagpadalum sa mga hambalanon. Bug-uson ang maathag nga plano para sigurohon nga huluhalintang nga nagadako ang isip sang malab-ot nga masa sa pagligad sang semana kag bulan sa mga empresa, komunidad, eskwelahan, opisina kag iban pa nga may konsentrasyon sang masa.

Dapat tigayunon sang mga pungsodnon-demokratiko nga pwersa ang lapnagon nga kampanya sang pangkatilingban nga pagpanalawsaw kag pagtuki sang mga sahi sa nagkalain-lain nga lugar kag sektor. Katungdanan sa nagkalain-lain nga lebel ang sistematiko nga pagtipon sang mga impormasyon kag datus agud tumuron ang mga partikular nga kahimtangan kag palaligban nga ginapangatubang sang masa sa balayon sang malakolonyal kag malapyudal nga sistema. Dapat nga tukion halin sa makasahi nga panan-awan sang proletaryado ang mga datus nga ini agud ibuyagyag ang ginaaguman nga pagpamigos kag pagpangulipon sa masa. Katungdanan nga isugpon ini sa mga hambalanon nga ginapangatubang sang bilog nga pungsod kag gisi-on ang mga ginadihon nga kabutigan sang nagahari nga rehimen. Dapat tumuron ang haum nga mga panawagan nga magapukaw sa ila kag mga pamaagi paano sila organisahon kag pahulagon sa pungsodnon-demokratiko nga kahublagan.

Ubos-kusog nga isulong ang isa ka sangkad nga kahublagan propaganda-edukasyon sa kubay sang masa nga lubos nga nagabuyagyag sa anti-imol kag makidumuluong nga rehimen US-Marcos. Pataason ang kamuklatan sang masa kag pukawon ang ila militansya kag kaisog nga ululupod nga ipakigbato ang ila demokratiko nga interes kag mga kinamatarung sa balayon sang reaksyunaryo nga laye samtang wala nagapahigot diri. Lubos pagtinguha nga ilantad ang rehimen US-Marcos kag ang reaksyunaryo nga estado nga pampulitika nga tiglawas sang bug-os nga nagahari nga sahi nga ginagamit para alagaran ang interes sang nagahari nga burgesyang kumprador kag dalagko nga agalon mayduta, kag sang mga dumuluong nga bangko kag kumpanya.

Pataason ang ikasarang sang mga pungsodnon-demokratiko nga pwersa nga madasig nga magpagwa sang mga pahayag nga nagatuki sa mga isyu agud magserbe nga ubay sa pagtuki kag paghulag sang masa. Papulahon ang kasyudaran kag kabukiran sa mga patriyotiko kag demokratiko nga singgitan sang pumuluyo. Pabahaon ang tanan nga dalan nga haum nga porma sang pasilhig kag solido nga propaganda nga direkta nagalab-ot sa masa. Hiwaton ang mga asembliya kag mga gulpihan nga palagwaon sa mga pabrika, eskwelahan, simbahan, merkado, terminal, kag mga komunidad para sa mga talakayan-banwa ukon ululupod nga paglantaw sang mga progresibo nga sine, dokumentaryo ukon pagbalita. Itigayon ang mga ini indi lang para maglantaw ukon mamati ang masa, kundi para hatagan sila sang kahigayonan nga magpautwas sang mga hibubun-ot, maghatag sang panan-awan kag makig-ugyon.

Dapat panginbabawan ang tanan nga bahin nga nagapaluya kag nagapugong sa pagsulong sang demokratikong kahublagan masa. Tumuron, ugaton kag isikway ang tanan nga bagahe nga nagapugong sa pagsulong sang masa, kabahin na ang tanan nga porma sang pagpang-alang-alang kag kabalaka ukon kahadlok sa kubay sang masa kag mga organisado nga pwersa. Mapanginbabawan ang tanan nga ini paagi sa pagsulong kag pagpamuno sa pakig-away. Madamo sang bag-o nga katungdanan ang kinahanglan nga tungdan, amo nga kinahanglan patuhawon ang madamo nga bag-ong pwersa. Ang kalayo sang mga paghimakas masa sa mga maga-abot nga binulan ang magapanday sa bag-o nga mga guban sang mga pungsodnon-demokratiko nga pwersa nga magatuhaw gikan sa kubay sang masa, nga magadugang sa kapagsik kag kaisog sang kahublagan masa sa kasyudaran kag kabukiran.

Magsalig sa mga bag-ong pwersa ilabi na sa kubay sang masunod nga henerasyon: makahas sila nga hatagan sang responsibilidad, ubayan, tasahon kag sumahon ang inagihan para sa madasig nga pag-uswag kag paglukdo sa nagabug-at nga mga hilikuton. Kadungan sini, padayon nga magpatuhaw sang bag-o nga mga kadre nga magapamuno sa mga hilikuton kag ipatigayon ang kumprehensibo nga paghanas sa ila sa ideolohiya, pulitika kag organisasyon.

Dapat pabaskugon sang Partido kag mga rebolusyonaryong pwersa ang pagpamuno sini para sa padayon nga pagpapagsik sang rebolusyonaryong kahublagan masa sa syudad kag kabukiran. Katimbang ini sa nagapanguna nga katungdanan nga pamunuan ang Bagong Hukbong Bayan kag pagsulong sang rebolusyonaryong armadong paghimakas sa kabukiran.