Liwat nga nagkaraban-martsa sadtong Enero 16 sa Manila ang linibo ka mga tsuper, opereytor kag ila nga mga pamilya para pangapinan ang ila palangabuhian sa pagpamasada kag ibalik ang ila 5 ka tuig nga prangkisa. Nagtililipon sila sa Quezon City bag-o nagkaraban padulong sa Mendiola sa Manila apang ginpunngan sang mga pulis sa kalabaon sang España, Manila. Diri sila naglunsar sang programa tubtob kaagahon sang masunod nga adlaw.

Bag-o sini, nagpiket sila sa House of Representatives sa Quezon City sadtong Enero 10 kadungan sang paghukom sang komite sa transportasyon kaangot sa panawagan nga ibasura ang peke nga modernisasyon sang rehimen US-Marcos.

Sa nasambit nga paghukom, gingisa sang mga makipungsod nga kongresista ang mga upisyal sang Land Transportation Franchising and regulatory Board (LTFRB) nga nagpakatig-a sa pwersahan nga konsolidasyon sang mga prangkisa. Naglutaw diri nga dako nga isip pa sang mga dyipni ang wala nagkonsolida, kabaliskaran sa pahayag sang ahensya. Madamo man mga ruta ang wala pa nakay-o, nga rekisito sa konsolidasyon.

Sa Senado kag Kongreso, nagtuhaw ang panawagan nga isuspinde ang pwersahan nga konsolidasyon tubtob wala pa naresolbar ang madamo nga hambalanon nga ginhan-ay sang mga tsuper kag opereytor. May mga panawagan man nga imbestigaran ang nagtuhaw nga alegasyon sang korapsyon sang mga upisyal sa LTFRB nga nakigkunsabuhay sa anay rehimen Duterte sa pagbakal sang tingob-tingob nga dumuluong nga mga “modernong salakyan” nga igabaylo sa mga tradisyunal nga dyip, nga may bahin nga lokal nga ginamanupaktura.

Samtang, ngprotesta ang mga pamatan-on sa upisina sang Asian Development Bank (ADB) sa Ortigas Center sa Mandaluyong City sadtong Enero 19 para kundenaron ang papel sini sa peke nga modernisasyon sa transportasyon. Ang ahensya ang nagatanyag sang imported nga “modernong dyip” sa tabon sang pagtapos sang “climate change.” Sadtong Enero 2019, ang ini man nga rason ang gingamit sang Office of the Solicitor General bilang sabat sa petisyon sang Piston batuk a pwersahan nga konsolidasyon sang mga indibidwal nga prangkisa.