Asud-asod ang mga pagpamatay, tuyo nga pagpatay, papang-ipit kag iban pa nga mga paglapas sa tawhanon nga kinamatarung sa isla sang Negros ang ginlunsar sang mga yunit sang 62nd IB sa nagligad nga mga semana.

Ginkuha kag gintortyur bag-o ginpatay sang mga suldado ang duha ka sibilyan sa Barangay Sag-ang, La Castellana, Negros Occidental sadtong Enero 17 sang aga. Para tabunan ang ila makangilidlis nga krimen, ginpagwa sang mga suldado nga napatay sila ni Boy Baloy, 60, kag Bernard Torres, 50, sa modus sini nga peke nga engkwentro.

Sila ni Baloy kag Torres ang gindakop sa ila ginadayunan nga balay, ginpalayo sa komunidad, ginpaidalom sa grabe nga interogasyon, ginkastigo kag gintortyur, bag-o gintiro sang mga berdugo. Si Baloy ang katapo sang Kaisahan sa Gamay’ng Mag-uuma sa Oriental Negros (KAUGMAON-Guihulngan Chapter), samtang si Torres ang isa ka drayber sang habal-habal kag katapo sang Undoc-Piston-Guihulngan Chapter. Sugod pa 2017, pasulit-sulit na nga naka-agum sang pagpang-ipit kag pagpangharas ang duha gikan sa mga pwersa kag ahente sang estado.

Indi mga Pulang hangaway ang duha, suno man sa Bagong Hukbong Bayan (BHB)-Central Negros.

Tuyo nga pagpatay. Gintiro sang mga suldado ang mamumugon sa kampo nga si Cerilo Bagnoran Jr samtang nagasakay sa iya motor kag nagabyahe sa crossing Cordova, Barangay Manghanoy, La Castellana sadtong Enero 14. Papuli na si Bagnoran sang ginparahan siya sang tatlo ka elemento sang 62nd IB Charlie Company sa Crossing Cordova kag ginapaulanan sang bala.

Antes nga tuyo nga pagpatay sa iya, ginapangita na daan sang mga nagpakilala nga pulis sadtong Enero 7 sa ila nga baryo. Satong Enero 8 , ginpangita siya sang 24 ka sundalo sang 62nd IB nga sadto naga-o‐ perasyon sa Sityo Mandayao-4, Ba‐ rangay Camandag, La Castellana.

Pagpang-ipit. Wala nakaluwas sa brutalidad kag terorismo sang estado ang pamilya Carreon sa Sityo Bonbon, Barangay Hinakpan, Guihulngan City. Sapilitan nga ginsulod kag ginransak sang may 40 ka tropa sang 62nd IB ang balay sang pamilya sadtong Enero 14 sang aga. Lapas sa laye nga ginapang-ukay sang mga suldado ang kagamitan sang pamilya kag ginapangita si Bimbo Carreon, ang tag-iya sang balay. Nagtuga sang kahadlok sa pamilya, ilabi na sa mga bata, ang atake militar.

Samtang sa Cavite, naka-agum sang pamahog ang mga mangunguma sa Lupang Ramos sa Dasmariñas sadtong Enero 15. Ginsulod sang lima ka elemento sang Philippine Army Scout Ranger sakay sang isa ka trak sang militar ang nasambit nga komunidad kag ginkasahan sang pusil ang mga residente. Ginapakigbato sang mga mangunguma sini ang kinamatarung sa 372 ektarya nga duta sugod pa sang 2014.