Sa sulod sang tatlo ka adlaw, naduso sang mga himata, abyan kag mga kasubong nga aktibista ang mga pwersa sang estado kag ang rehimen Marcos nga ilutaw sila ni Francisco “Eco” Dangla III kag Joxelle “Jak” Tiong. Gin-abdak ang duha sadtong alas-8 sang gab-e sang Marso 24 sa Barangay Polo, San Carlos City, Pangasinan. Gin-anunsyo sang mga grupo sa tawhanon nga kinamatarung nga “wala na sa kamot sang mga nag-abdak sa ila ang duha, puno sang kastigo, pero buhi” sadtong Marso 27.

Sa pahayag sang mga nakasaksi, gin-abdak ang duha pagkatapos balabagan sang isa ka SUV ang traysikol nga ginasakyan nila. Duwa tubtob tatlo ka tawo halin sa SUV kag isa pa ka nakasakay sa isa ka motor ang nagkastigo kag nagsakay sa ila sa salakyan, hambal nila. Nabatian pa nila ang pagpangayo ni Tiong sang bulig.

Si Dangla, 39, ang anay estudyante sang University of the Philippines kag nagatindog nga tigpamaba sang Bagong Alyansang Makabayan (Bayan)-Pangasinan. Samtang si Tiong, 29, gradweyt sang Universidad de Dagupan ang koordineytor sang Kabataan Partylist sa prubinsya. Pareho sila nga tigtipon sang Pangasinan People’s Strike for the Environment, grupo nga nagapanindugan batuk sa plano nga black sand mining kag pagtukod sang nuclear power plant sa prubinsya. Bag-o ang insidente, biktima na ang duha sang wala untat nga Red-tagging, pagpaniid, intimidasyon kag iban pa nga porma sang pagpang-ipit sang armado nga pwersa sang estado.

Dako ang nangin bulig sang malaparan nga pagpangita kag pagtuga sang gahod para mapalutaw ang mga biktima. Gilayon nga nabalita ang panghitabo sang pag-abdak sa ila, napaskil sa social media, nakapagwa sang mga pahayag kag nag-ani sang suporta halin sa mga grupo nga maki-kinaiyahan kag iban pa. Nabalita man ini gilayon sa telebisyon.

Nagprotesta man gilayon ang mga tigpangapin sang tawhanon nga kinamatarung sadtong Marso 25 sa Quezon City para kundenaron ang pag-abdak sang mga ahente sang AFP kag PNP sa duha. Nagtukod man sang tim para kadtuan ang mga kampo militar kag istasyon sang pulis sa ginakahamtangan sang mga biktima.

Kabahin sang kampanya ang pagkadto sang mga himata nila ni Dangla kag Tiong, upod sa Kabataan Representative Raoul Manuel, mga tawong simbahan kag iban pa nga mga grupo sa Camp Lt. Tito Abat, Barangay Calaoacan, Manaoag, Pangasinan, kampo sang 702nd IBde, 7th ID. Nangusisa sila sa kampo kag nagpasaka sang “inquiry” kaangot sang report sa pilit nga pagkadula nila Dangla kag Tiong.