Naghatag sang kahadlok sa mga residente ang ginlunsar nga aerial bombing sang Armed Forces of the Philippines (AFP) sa mga komunidad sa dulunan sang Sta. Maria, Ilocos Sur kag Pilar, Abra sadtong Abril 2 sang udto. Indi magnubo sa 212 ka pamilya ang nagbakwit tungod sa mga pagpamomba kag pagpang-ipit sa ila nga palangabuhian. Magluwas diri, ginatos ka tropa militar man ang ginbubo sa lugar para sa operasyon kontra-insurhensya.

Ang paggamit sang baskog nga mga bomba ang “duna nga indiscriminate” ukon wala sang may ginapili, nagabutang sa katalagman sa kabuhi kag palangabuhian sang mga sibilyan kag nagatuga sang malapad nga pagkawasak sa kinaiyahan. Sa kamatuoran, lapaw sa ground zero ang epekto sang pagpamomba sang AFP halin sa kahawaan, kabaliskaran sa ginawakal sang 501st IBde nga pagpamomba ang nakati-on lang sang isa ka yunit sang Bagong Hukbong Bayan (BHB)-Abra.

Pagpatay. Gintiro tubtob mapatay sang 62nd IB kag mga pulis ang sibilyan nga mangunguma nga si Marlon Catacio sa Sityo Angalan, Barangay Quintin Remo, Moises Padilla, Negros Occidental sadtong Abril 4. Agud nga palagyuhan ang salabton, ginpagwa sang militar nga Pulang hangaway si Catacio nga napatay sa isa ka engkwentro. Gilayon ini nga ginpanginwala sang mismo iloy sang biktima.

Pag-aresto. Gindakop sang 62nd IB si Ronald Cantela sa Sityo Pitik-pitik, Barangay Luz, Guihulngan City sadtong Marso 20. Ginpagwa sang mga suldado nga nakumpiskar sa iya nga balay ang isa ka pistola. Ginbungkag man sang mga suldado ang kagamitan sang pamilya samtang nagapangukay.

Pagpang-abuso. Ginhikap kag ginbastos sang isa ka hubog nga elemento sang 59th IB ang isa ka dalagita sa Sityo Sales, Barangay Pook, Balayan, Batangas sadtong Marso 28. Magluwas diri, wala sang rason man nga ginkastigo sang suldado ang 14-anyos nga lalaki nga upod sang dalagita.

Pagpang-ipit. Ginpahog kag ginharas sang gintingob nga mga pwersa sang pulis, militar kag upisyal sang barangay ang tim sang mga boluntir nga nagpatigayon sang imbestigasyon bahin sa epekto sang El Niño sa mga mangunguma kag residente sang Barangay Sampaga, Balayan, Batangas kaagahon sang Marso 24.