Ayuda ug suporta sa mga apektado sa El Niño, ihatag! Nagpiket ang mga grupo sa mag-uuma ug mangingisda sa upisina sa National Food Authority (NFA) ug Department of Agriculture (DA) sa Quezon City niadtong April 3. Gimakmak nila ang duha ka ahensya sa rehimeng Marcos sa pagpasagad ug pagkainutil niini nga tabangan ang mga mag-uuma ug mangingisda nga hilabihang apektado sa kadaut sa El Niño.

Kumpanyang Boskalis, gipapanubag sa kadaut sa Manila Bay. Nagprotesta atubangan sa embahada sa The Netherlands sa Maynila niadtong Marso 22 ang mga grupong maki-kinaiyahan, syentista, mangingisda ug mga residente sa mga baybay sa Manila Bay aron singlon ang Boskalis Westminster NV, usa ka kumpanyang Dutch, sa gibunga niining kadaut tungod sa dredging alang sa proyektong reklamasyon niadtong 2021-2023. Ang maong dredging pag-andam sa pagtukod sa proyekto sa San Miguel Corporation na New Manila International Airport sa Bulacan. Usa ka susamang protesta ang gilunsad sa Papendrect, The Netherlands, kung asa nahimutang ang hedkwarters sa Boskalis.

Mga estudyante sa UST, nagkahiusa batok sa pagpanumpo sa kampus. Naglunsad og lihok-protesta ang mga estudyante sa University of Sto. Tomas (UST) atubangan sa kampus niini sa Maynila niadtong Marso 22 aron kundenahon ang mapanumpuong mga palisiya sa unibersidad. Kini human nagpadayag og pakighiusa sa mga konseho sa estudyante, mga mantalaan, ug uban pang organisasyon sa kampus niadtong Marso 20 batok sa administrasyon sa UST. Gipasiugdahan ang mga aktibidad sa Rise for Education Alliance-España.

Langyawng pagpanag-iya sa mga eskwelahan ug taas nga matrikula, gimakmak. Nagprotesta ang mga kabatan-onang estudyante atubangan sa Commission on Higher Education (CHED) sa Quezon City niadtong Marso 22 aron batikuson ang pagduso sa rehimeng US-Marcos sa charter change nga magtugot sa 100% nga pagpanag-iya sa langyaw sa mga eskwelahan sa nasud. Gikundena usab nila ang planong pagtaas sa tuition sa mga pribadong unibersidad nga lagmit aprubahan sa CHED isip “rubber stamp” sa maong mga eskwelahan, matud nila.

Serye sa pagpanangtang sa Nexperia, gibatukan. Nagprotesta niadtong Marso 22 sulod sa Laguna Industrial Science Park sa Cabuyao, Laguna ang mga mamumuo sa Nexperia Philippines, kauban ang ilang mga tigsuporta, aron babagan ang nakatakdang pagtangtang sa 54 nga mamumuo sa Abril. Ikaduha na kini sulod sa walo ka bulan. Sayod sila nga tumong sa serye sa pagpanangtang nga bungkagon ang unyon nga nakakab-ot na og mga kadaugan sa hiniusang protesta sa mga mamumuo sa nangagi.