Daytoy Abril, dua a mannalon ti napapatay idiay Masbate. Isuda ti maika-27 ken maika-28 a mannalon a pinatay ti Armed Forces of the Philippines (AFP) iti isla iti sidong ti rehimen Marcos.

Dinukot ti uppat a kameng ti CAFGU ni Elorde Almario, 43, iti taltalon na idiay San Carlos, Milagros idi Abril 2. Nasarakan isuna a natay dagiti kabagian na iti daydiay nga aldaw. Iti ulat ti pamilya na, adda dagiti tama ti paltog ken pagilasinan ti tortyur a napasaran ti biktima iti bangkay na.

Idi Abril 4, dinukot ti pareho a grupo dagiti CAFGU ni Nonong Monteseban, dati a kapitan ti San Carlos. Kalpasan a binugbog da, pinalubosan dagiti pasista gapu kano ta saan nga isu ti birbiroken da.

Idi Abril 11, pinatay ti AFP ni Jimmy Pautan iti Sitio Tadloy, Barangay Luna, Placer. Kas iti adu a kaso, parparuaren ti AFP a Nalabbaga a mannakigubat ni Pautan a napapatay iti maysa nga engkuentro.

Kabayatan na, pinalto-paltogan dagiti elemento ti 4th IB ni Jay-el Banay Maligday, maysa nga estudyante iti Grace Mission College ken residente ti Sitio Soryawon, Barangay San Roque, Bulalacao, Oriental Mindoro idi Abril 7. Pinaruar ti militar a kameng isuna ti NPA kalpasan a rinaut ti maysa a platun dagiti soldado ti balay na.

Panagdukot. Dinukot ken agingga iti agdama ket saan pay nga inparang dagiti ahente ti militar ni William Lariosa, beterano nga organisador ti Kilusang Mayo Uno-Southern Mindanao. Dinukot da ni Lariosa, 63, idi Abril 10 idiay Barangay Butong, Quezon, Bukidnon. Nabayagen a pagpupudotan ti militar ni Lariosa ken ti pamilya na isu a nagsangtwaryo idiay Bukidnon.

Gandat a panagpadisi. Nasugatan ken natalimudaw ti maysa a lokal a residente ti Lupang Tartaria idiay Silang, Cavite idi Abril 16 idi agpilit dagiti guardia manipud Jarton Security Services a serken ti komunidad dagiti mannalon.

Dimmarup ken nakidinnuron dagiti guardia iti Tartaria tapno aladan ti daga. Dagiti nasao a guardia ket agserserbi a private goons ti agkaddua nga Ayala-Aguinaldo, a nabayagen a mangag-agaw iti nasao a daga. Segun kadagiti mannalon, iligal ti panagal-alad da kabayatan a maur-uray pay ti desisyon ti Department of Agrarian Reform ken ti Korte Suprema kanaig ti panagtagikua ti daga.

Demolisyon. Iligal a dinuprak ti nagkappeng a puersa ti National Housing Authority ken pulis ti Quezon City ti kabalbalayan idiay San Isidro, Quezon City idi Abril 18. Adda ti 700 a pamilya ti apektado iti demolisyon iti komunidad nga adda iti likod ti Philippine Children’s Medical Center. Naituding a matakderan ti parking lot ti nasao a lugar.