Niining Abril, duha ka mag-uuma ang gipatay sa Masbate. Sila ang ika-27 ug ika-28 nga mag-uumang gipatay sa Armed Forces of the Philippines (AFP) sa isla ilalum sa rehimeng Marcos.

Gidagit sa upat ka myembro sa CAFGU si Elorde Almario, 43, sa iyang umahan sa San Carlos, Milagros niadtong Abril 2. Nakapalagan siyang patay na sa iyang mga paryente sa maong adlawa. Sa taho sa iyang pamilya, adunay mga igo pinusilan ug timailhan sa tortyur ang patayng lawas sa biktima.

Kaniadtong Abril 4, gidagit sa parehong grupo sa mga CAGFU si Nonong Monteseban, kanhing kapitan sa San Carlos. Human gikulata, gibuhian siya sa mga pasista tungod kay dili kuno siya ang ilang gipangita.

Niadtong Abril 11, gipatay sa AFP si Jimmy Pautan sa Sityo Tadloy, Barangay Luna, Placer. Sama sa daghang kaso, ginapagawas sa AFP nga Pulang manggugubat si Pautan nga napatay sa usa ka engkwentro.

Samtang, girakrakan sa mga elemento sa 4th IB si Jay-el Banay Maligday, usa ka estudyante sa Grace Mission College ug residente sa Sityo Soryawon, Barangay San Roque, Bulalacao, Oriental Mindoro niadtong Abril 7. Gipagawas sa militar nga myembro siya BHB human giatake sa usa ka platung sundalo ang iyang balay.

Pagdagit. Gidagit ug wala pa gipakita hangtud karon sa mga ahenteng militar si William Lariosa, iladong organisador sa Kilusang Mayo Uno-Southern Mindanao. Gidagit si Lariosa, 63, niadtong Abril 10 sa Barangay Butong, Quezon, Bukidnon. Dugay nang giinitan sa militar si Lariosa ug iyang pamilya maong nagpadangup siya sa Bukidnon.

Sulayng pagpalayas. Nasamdan ug nakuyapan ang usa ka residente sa Lupang Tartaria sa Silang, Cavite niadtong Abril 16 dihang namugos ang mga gwardya gikan Jarton Security Services nga sudlon ang komunidad sa mga mag-uuma.

Miatake ug nakigdusdos ang mga gwardya sa Tartaria sa tinguhang koralon ang yuta. Nagsilbing private goons ang maong mga gwardya sa mga Ayala-Aguinaldo, nga dugay nang nangangkon sa maong yuta. Matud sa mga mag-uuma, iligal ang gihimong pagkoral samtang natanggong pa ang desisyon sa pagpanag-iya sa yuta sa Department of Agrarian Reform ug sa Korte Suprema.

Demolisyon. Iligal nga gidemolis sa giusang mga pwersa sa National Housing Authority ug pulis sa Quezon City ang kabalayan sa San Isidro, Quezon City niadtong Abril 18. Anaa sa 700 ka pamilya ang apektado sa demolisyon sa komunidad nga anaa sa likod sa Philippine Children’s Medical Center. Nakatakdang tukuran og parking lot ang maong lugar.