Rinibo a tropa nga Amerikano ken dagiti luganda ti nagsanglad iti pagilian sakbay pay a nangrugi ti Balikatan. Saan a bumaba iti 400 a lugan ti militar manipud iti hedkwarters ti Indo-Pacific Command ti US iti Hawaii ti indiskarga ti dadakkel a barko idiay Subic Bay idi Marso. Idi Abril 1, insayangkat ti US dagiti maniobra a kombat iti kabaybayan ti Pilipinas kakuyog dagiti barko a panggubat ti Australia ken Japan ken bassit a barko ti Pilipinas. Kadagiti sumaruno nga aldaw, inpannakkel pay ti US dagiti unilateral a live-fire exercises (panagpasabog kadagiti misayl), panagpatayab kadagiti jet fighter ken dadduma pay a maniobra a militar iti tangatang ken kabaybayan ti pagilian.

Idi met Abril 1, narugian ti 5-aldaw a pulong militar iti Camp Aguinaldo nu sadinno nga inbingay ti AFP iti militar ti US dagiti sensitibo ken internal nga usapin iti seguridad ti Pilipinas iti naawagan a kaunaan nga “Information Warfare Exercise.”

Aggiddan a naluktan ti tallo a dadakkel a war games idi Abril 8: ti Cope Thunder kadagiti eropuerto iti Central ken Northern Luzon; MAREX 2024 iti Maguindanao del Norte ken Salaknib 2024 iti Fort Magsaysay idiay Nueva Ecija.

Kadagiti immuna a Balikatan idi dekada 1990, maysa daytoy a bilateral wenno dua a benneg nga “ehersisyo militar” para iti “inter-operability” wenno panagsilpo ti armado a hukbo ti US ken aso-aso nga AFP. Ngem manipud idi “nagbuelta” ti US iti Asia, inlukat daytoy ti US, ken ti soberano a teritoryo ti Pilipinas, iti dadduma a gangannaet a tropa. Iti umay a Balikatan, 14 a sabali a pagilian (Brunei, Canada, France, Germany, Great Britain, India, Indonesia, Japan, Malaysia, New Zealand, Republic of Korea, Singapore, Thailand at Vietnam) ti pumaset ken agpaliiw iti panagpabuya ti US.

Iti kastoy, agserserbi met a dakkel a pabuya dagiti armas ti Balikatan ken dadduma pay a war games ti US nu sadinno nga ipabpabuya daytoy dagiti armas nga aramid ti Amerikano a monopolyo a kumpanya a militar. Tatta a tawen, inaramid ti US a paset ti Balikatan ti operasyon ti ilaklako daytoy nga aramid ti Israel a missile defense system.