Welga ti transportasyon, balligi. Nagisayangkat ti welga ti transportasyon idi Abril 15-16 ti PISTON ken Manibela tapno ipaganetget a maisanud ti puersado a konsolidasyon ti prangkisa inton Abril 30 ken isubli ti 5-tawen nga indibidwal a prangkisa. Adda iti 80% dagiti mayor a ruta iti Metro Manila ti naapektaran ken mano a paset ti Cavite ken Laguna ti naparalisa. Iti umuna nga aldaw, dimmanon iti 400 a dyip ti pimmaset iti protesta ken karaban agturong iti LTFRB, nu sadinno a nagpalabas da ti rabii. Kinabigatan na, nagkomboy dagiti drayber ken opereytor agturong iti Welcome Rotonda iti nagbedngan ti Quezon City ken Manila.

Adda met dagiti kapada a welga ti transportasyon iti Iloilo, Bacolod ken Cebu ken tignay-protesta iti Davao. Daytoy nga aktibidad ket paset ti serye dagiti tignay a plano nga isayangkat ti dua a grupo iti transportasyon agingga agtapos ti bulan.

Panangduprak iti NTF-ELCAC, balbaliw a naipanawagan. Nagprotesta dagiti kameng ti KMP ken dadduma pay a grupo ti mannalon iti sango ti National Intelligence Coordinating Agency iti Quezon City idi Abril 12 tapno kundenaren ti panangiraman ti NTF-Elcac iti KMP kadagiti 30 nga organisasyon nga inawagan da a “prente” ti Partido ken NPA. Kunada, daytoy a red-tagging ket paset ti panangpainget iti pananglipit ti rehimen Marcos kadagiti ligal ken lehitimo nga organisasyon ti masa, umannurot iti kontra-insurhensiya nga operasyon daytoy a nakabasar iti tarabay ti US.

Protesta a Red Friday (Nalabbaga a Biyernes) para iti sueldo, naisayangkat. Insayangkat dagiti mangmangged ti umuna a Red Friday Protest para iti nayon a sueldo ken laban iti maka-negosyo ken maka-gangannaet a PUVMP idi Abril 12 idiay Marikina City ken Monumento, Caloocan idi Abril 19. Kinundena da ni Ferdinand Marcos Jr. a kunada a puro daldal iti chacha (charter change) ngem agtaltalinaed a naulimek panggep iti sueldo. Tinalmegan da a palalo a bassit ken maladladaw pay ti it-ited dagiti regional wage board iti napan a tawen.