Forced leave, floating status, furlough, on-call basis—pipila lamang kini sa klase-klaseng pakana sa mga kapitalista sa pleksibleng pamuo nga naghatag dalan sa malukpanong iligal nga pagpanangtang sa mga mamumuo. Niini nga mga kundisyon, ginakibhangan sa kapitalista ang trabaho sa mamumuo og usa ka adlaw hangtud unum ka bulan. Mamahimong adunay bahin nga sweldado ang pugos nga pagpabakasyon, apan sagad walay gakadawat nga suhol ang mga mamumuo niini nga mga adlaw o bulan.

Kabahin sa neoliberal nga palisiya sa pamuo ang maong mga pleksibleng kahimtang. Kaniadto pang 1985 gitugutan sa estado ang mga kapitalista nga kulangan ang regular nga adlaw sa trabaho sa takuban sa “pagluwas sa negosyo.” Kinahanglan lamang nilang itaho nga mihinay o kulang ang order o mga proyekto aron matugutang dili na pasudlon sa trabaho ang ilang mga trabahante.

Nakasulat sa balaod nga angayang temporaryo lamang ang maong mga kundisyon, apan sa sobrang kadugay nga walay suhulan, daghang mamumuo ang napugos nga mobiya aron mangita og laing trabaho. Sa ilang pagbiya sa trabaho, nakaikyas ang kapitalista sa ilang tulubagon nga maghatag og mga benepisyo sama sa severance pay ug nakalikay kini sa kasong iligal nga lockout o pagsirado sa pabrika. Ginatago usab sa maong kundisyon ang reyalidad nga ang liboan ka mamumuong nakakategoryang adunay trabaho, sa aktwal, walay trabaho.

Migrabe ang maong mga kundisyon niadtong panahon ng pandemya dihang gisuspinde o gikibhangan sa daghang kumpanya ang ilang mga operasyon. Gipahimuslan sa kapitalista ang krisis ug gitukmod ang pagpalungtad sa pagkibhang sa mga adlaw sa trabaho og hangtud usa ka tuig. Kaylap ang maong pakana sa business process outsourcing (BPO o mga call center), industriya sa sanina, elektroniks ug information technology. Sa sektor sa BPO pa lang, 4 sa matag 10 ka mamumuo ang gibutang sa “floating status” nga walay bayad. Daghan kanila ang wala na gibalik sa trabaho.

Dihang “subling giablihan” ang ekonomiya, kakulang usab sa mga “order” o kahinay sa proyekto ang gihimong hinungdan sa mga kapitalista aron temporaryo hangtud permanenteng tangtangon sa trabaho ang mga mamumuo. Lakip dinhi ang liboan ka mamumuo sa mga pabrika sa Mactan Export Processing Zone nga gibutang sa floating status ayha hingpit nga gisisante niadtong 2022-2023.

Sa Laguna niining Abril, gipailalum sa Nexperia Philippines sa “temporaryong terminasyon” ang 54 ka mamumuo niini sa sunod unum ka bulan. Dugang 72 pa ang ibutang sa parehong istatus sa Setyembre. Labing bag-o ang maong maniobra sa serye sa pagpanangtang sa pabrika sa rason nga “mihinay” ang produksyon sa kumpanya.

Sa Pampanga, giantus sa 1,000 ka mamumuo sa pabrika sa Luen Thai Philippines, kumpanyang nagahimo og mahalong bag, ang forced leave ug walay suhol gikan Enero hangtud Marso. Aron makalikay sa tulubagon, nagdeklara ang kapitalista nga mikunhod ang produksyon sa pabrika bisan gipabilin niini ang nagtunhay nang ang-ang sa produksyon.

Aron saluhon ang nabakanteng mga trabaho, gipatas-an sa kapitalista ang kota sa nahabiling mga trabahante ngadto sa 130-180 ka handbag kada adlaw. Ang dili maabot sa kota, gibaharang ibutang usab sa forced leave. Walay gihatag ang kapitalista nga kasigurahang ibalik sa trabaho ang mga gipailalum sa maong iskema.

Sa Bataan, kapin usa ka tuig nang anaa sa “forced leave” ang mga mamumuo sa Universal Weavers Corporation, usa ka pabrika sa mga kagamitan ug saninang pangmedikal. Rason sa kumpanya, wala nay “ginapahimo ug order” sa ila maong wala na sila gipasulod sa pabrika.

Sayod ang mga mamumuo nga adunay mga order ang kumpanya apan mas gipili niining dalhon sa Cambodia ang produksyon tungod kay mas barato ug ubos silang magpasuhol didto. Nagalikay usab ang kumpanya sa tulubagon niining ihatag ang ilang benepisyong 13th month pay ug uban pa.

Nagpapirma pa ang maneydsment og waiver kung asa nakasulat nga miuyon kini nga mangita og laing trabaho ang mga mamumuo samtang naka-forced leave sila. Sukwahi kini sa balaod nga nagabawal sa maong lakang. Sa aktwal, naghatag dalan kini sa kapitalista nga lusawon ang years of service (mga tuig sa pagtrabaho) sa mga mamumuo ug ligal nga tangtangon sila sa pabrika nga walay separation pay.